Mańǵystaýdyń Quryq aýylynda jastar toptasyp tóbelesýden tyıylmaı otyr
Qańtar aıynda bir top jasóspirim 14 jasar balany soqqyǵa jyǵyp, jetkinshek aýrýhanadan bir-aq shyqty.
Al, sońǵy oqıǵa mamyrdyń 14-i kúni bolǵan. Bir top jas 19 jasar bozbalany urlap alyp ketip, uryp-soqqan.
Qazir osy derek boıynsha qylmystyq is qozǵaldy. Kúdiktiler izdestirilýde. Balalarynyń qaýipsizdigine alańdaǵan ata-analar quzyrly organdardan kómek suraıdy.
— Shaǵynaýdanǵa kirip ketti dep tóbelesedi. Avtobazaǵa kirse, avtobazaǵa kirdi dep tóbelesedi. Shashtaraz, fastfýd — bári ortalyqta ornalasqan. Al biz balalarymyzdy jalǵyz jibere almaımyz. Taksımen aparyp-ákelip, jetektep júremiz. Ortalyq kóshede kontsert bolsa, bizdiń avtobazanyń bir de bir balasy kelip, kontsert qaraı almaıdy. Ata-analar bolyp quzyrly organdarǵa shaǵymdandyq. Biraq ázirge nátıje joq, — deıdi Quryq aýylynyń turǵyny Anargúl Bekenova.
Kópbalaly ana Zúlfııa Batyrbaev bolsa aýyldaǵy tóbelestiń saldarynan balasyn jumysqa jibere almaı otyr.
Aıtýynsha, turǵyndardyń berekesi qashqan. Qorqyp, úrkip ómir súrýge májbúr.
— Balam jazǵy demalys kezinde «Jasyl el» jasaǵynyń qataryna jumysqa kirip, eki apta jumys istedi. Endi myna tóbelestiń kesirinen jumysqa shyǵa almaı otyr. Shyqpaı qalǵan kúnderge eńbekaqysyn da ala almaıyn dep otyr. Tipti, dúkenge jalǵyz jiberýge qorqamyz, — deıdi aýyl turǵyny.
Qaraqııa aýdannyń prokýrory Amanjol Aıtýǵanov aýyldaǵy keleńsiz jáıtterdiń sebebin anyqtaǵan. Aıtýynsha, jastardyń tóbelesine aıtarlyqtaı sebep joq.
Tek mundaı jaǵdaı 1978 jyldan beri qalyptasqan. Oǵan aýyl úlkenderi kýá. Sodan beri jastar ekige bólinip, kóshelerinde bir-birin júrgizbeıdi.
— Qozǵalǵan qylmystyq ister boıynsha kýágerlerden, jábirlenýshilerden jaýap ala kele bizdiń túsingenimiz — Quryq aýylynda ekige bóliný bar. Bir-biriniń aýmaǵyna barmaýy kerek. Bir-biriniń aýmaǵyna barǵan jaǵdaıda kóshede toptasyp júrmeı, aıqaı-shý shyǵarmaı, ázildespeı, bir-birimen oınamaı, shyǵyp ketip qalýy kerek eken. Al jańaǵyndaı ázildestiń be, ala kózińmen qarap qaldyń ba — boldy, toptasyp tóbelesedi. Sosyn qylmystyq is qozǵalsa, aýyl turǵyndary bir-birin tanıtyn bolǵasyn bir-biriniń ústinen shaǵymdanbaıdy, — deıdi aýdan prokýrory Amanjol Aıtýǵanov.
Al, Qaraqııa aýdandyq polıtsııa bóliminiń basshysy Amanbek Shalbaev aýyl turǵyndarynyń tynyshtyǵyn saqtaý úshin reıd kúsheıtilgenin jetkizdi.
Endi qyzmetkerlerdiń sanyn arttyrý máselesi qaralyp jatyr. Sonymen qatar, aldaǵy ýaqytta eldi-mekenge 60 qa jýyq beınekamera qoıylmaq.
Buǵan deıin Túrkistan oblysynda jappaı tóbelesken jastar birin-biri aǵashpen aıaýsyz uryp-soqqanyn jazǵan edik.