Mańǵystaýdaǵy UQK Shekara qyzmetinde aǵaıyndy úshem qyzmet etedi

<p>Mańǵystaý oblysynda QR UQK Shekara qyzmetinde kelisimshart boıynsha Aǵarys, Bekarys jáne Janarys esimdi aǵaıyndy úshem sarbaz qyzmet etedi. Aǵaıyndy Zekenovter jaǵalaý kúzetiniń birinshi dıvızıonynda bir jyldan astam ýaqyttan beri mergen qyzmetinde júr, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</p>

Olardyń áskerı qyzmettegi basty mindeti — bólimshege qarasty nysandardy kúzetý jáne ártúrli narıadtarda qyzmet atqarý, atap aıtsaq, ishki qaraýyl, baqylaý-ótkizý pýnkti boıynsha kezekshilik, park boıynsha kezekshilik.

Áskerı qyzmette ótkergen qysqa merzim ishinde egizder aıtarlyqtaı nátıjelerge qol jetkizgen, birinshi dıvızıon komandıri men departament bastyǵynyń gramotalarymen marapattalǵan.

«Aǵaıyndy Zekenovtar óte ádepti jáne adal balalar. Olar ózderiniń qyzmettik mindetterine adal jáne jaýyngerlik jáne memlekettik-quqyqtyq daıyndyqta úzdik nátıje kórsetedi. Meniń oıymsha, jigitterdiń áskerı qyzmette bolashaǵy zor», - dep bólisti jaǵalaý kúzetiniń birinshi dıvızıonynyń kúzet tobynyń komandıri maıor Amantaı Koshakov.

Aǵarys, Bekarys jáne Janarys esimdi baýyrlardyń baılanysyn áskerdegi qyzmet bekite túsken. Bolashaqta aǵaıyndylar UQK Shekara qyzmeti akademııasyna túsip, ofıtser bolǵylary keledi.

«Týmalas bolǵasyn bala kúnimizden biz árqashan birge boldyq, bir mektepte jáne bir kolledjde oqydyq, al Otan aldyndaǵy boryshymyzdy óteý ýaqyty kelgende bir bólimge qyzmet etýdi ótindik. Biz bala kezimizden áskerı bolýdy armandadyq, sondyqtan merzimdi qyzmetten keıin kelisimshart negizindegi áskerı qyzmetke shaqyrtý aldyq», - dedi Bekarys.

Kishkentaı aıyrmashylyqtary bolǵanymen aǵaıyndylar bir-birine óte uqsas. Aǵarys pen Bekarys bala kezinen karate-do sportymen shuǵyldanǵan. Al Janarys - sambodan sport sheberine úmitker.