Mańǵystaýda júzdegen bala ýlanyp qalǵan mektep ashanasy jabyldy

<p>ASTANA. KAZINFORM — Oqý-aǵartý mınıstrligi Mańǵystaý oblysynda balalardyń ýlanýyna qatysty málimdeme jasady. Qazir oqıǵa ornynda bala quqyqtaryn qorǵaý komıtetiniń ókilderi jumys isteýde. Balalarǵa qajetti medıtsınalyq jáne psıhologııalyq kómek kórsetilip jatyr. Atalǵan fakti boıynsha qylmystyq is qozǵaldy.</p>

Búgingi tańda dárigerge júgingen bala sany — 460, onyń 377-si úı jaǵdaıynda baqylaýǵa jiberildi. 

Oblystyq balalar juqpaly aýrýlar aýrýhanasyna 83 bala jatqyzyldy. Al jansaqtaý bólimindegi eki bala búgin jalpy palataǵa aýystyryldy. Oqýshylardyń densaýlyǵy jaqsaryp keledi. Al úıinde baqylaýda bolǵan oqýshylar búgin mektepke bara bastady.

Mektep ashanasy mór basylyp, jabyldy. Balalar tolyq saýyqqannan keıin olarǵa qosymsha sabaqtar uıymdastyrylady.

Búginnen bastap QR Oqý-aǵartý mınıstriniń tapsyrmasy boıynsha barlyq oblystar men qalalarda mektepterdiń as bloktaryna monıtorıng júrgizý úshin mobıldi toptar uıymdastyryldy.

Bul toptar ystyq tamaqty uıymdastyrý sapasyn jáne balalardyń sanıtarlyq-epıdemıologııalyq amandyǵyn qamtamasyz etý jáne tamaqtan ýlanýdyń aldyn alý maqsatynda sanıtarlyq-epıdemıologııalyq talaptardyń saqtalýyn baqylaıdy.

«Aıta keteıik, mektepke tamaq jetkizýshiler azyq-túlik sapasyn qamtamasyz etýge jáne olardyń sanıtarlyq-epıdemıologııalyq normalarǵa sáıkes bolýyna tikeleı jaýapty. Árbir árekettiń artynda balalarymyzdyń ómiri men densaýlyǵy turǵanyn este ustaǵan jón» deıdi vedomstvodan.

Eske salaıyq, 7 qyrkúıek kúni Munaıly aýdanynyń emhanasyna astan ýlanǵan 141 bala kómekke júgingen bolatyn.

Ýlanǵan oqýshylardyń ishinde 67 bala aýrýhanaǵa jatqyzyldy.

Keıinnen as ishken soń jaǵdaıy nasharlaǵan oqýshylardyń sany 222-ge jetti.

Búgin bul isti Úkimet óz baqylaýyna alyp, tez arada búkil mektepterdiń ashanasy tekseriletinin málimdedi.