Mańǵystaýda jyl basynan beri óndiriste 2 adam qaza boldy
Mańǵystaý oblysynyń memlekettik eńbek ınspektsııasy basqarmasynyń basshysy Nurlan Telegenovtiń aıtýynsha, bıyl zardap shekken adam sany 2023 jyldyń alǵashqy úsh aıyna qaraǵanda 86 paıyzǵa kóbeıgen.
«Bıyl óńirde alǵashqy toqsanda 13 adam óndiriste zardap shekti. Onyń ishinde 2 adam qaıtys boldy. Kisi ólimimen aıaqtalǵan jazataıym oqıǵanyń biri «MunaıSpetsSnab» JShS-i men «Qazaqstan temir joly» UQ» AQ-nyń Mańǵystaý magıstraldyq jeli bólimshesine qarasty jol dıstantsııasynda tirkeldi. Jazataıym oqıǵanyń negizgi sebebi - jumysta qaýipsizdik erejeleriniń durys saqtalmaýy. Máselen, «MunaıSpetsSnab» kompanııasynda qaıǵyly oqıǵa jumys berýshiniń kinásinen bolǵan. Al Mańǵystaý magıstraldyq jeli bólimshesine qarasty jol dıstantsııasynda jumys berýshisiniń kinási 70 paıyz, marqum jumyskerdiń kinási 30 paıyz ekeni dáleldendi», - dedi Nurlan Telegenov.
Ókinishke qaraı, oblysta jazataıym oqıǵa atalǵan jaǵdaılarmen shektelgen joq. Qazirgi ýaqytta «Ózenmunaıgaz» AQ-da bolǵan oqys oqıǵa tekserilip jatyr.
Sonymen qatar, bıyl Mańǵystaý memlekettik eńbek ınspektsııasy «GEOS» JShS jáne «Munaı Kaspıı Gaz» JShS-de óndiriste oryn alǵan jazataıym oqıǵany jasyrý deregi anyqtaǵan. Atalǵan oqıǵa boıynsha kásiporynǵa ákimshilik aıyppul salyndy.
Aıta ketetin jaıt, Mańǵystaý oblysyndaǵy kásiporyndarda jazataıym oqıǵalardyń negizgi sebepteri eńbek qaýipsizdigi erejelerin buzý, jumystyń durys uıymdastyrylmaýy, zardap shegýshiniń óreskel qateligi, eńbek jáne óndiris tártipterin, jol qozǵalysy erejelerin buzý saldarynan ekeni tekserý barysynda anyqtalǵan.
«Memlekettik eńbek ınspektorlary bıylǵy birinshi toqsanda 157 tekserý júrgizdi. Osynyń sheńberinde 166 zań buzýshylyq anyqtaldy. Bul zań buzýshylyqtardy joıý jáne olardy aldaǵy ýaqytta boldyrmaý maqsatynda 120 nusqama engizilip, 31 ákimshilik quqyq buzýshylyq týraly is qozǵaldy. Sonyń nátıjesinde 11,4 mln teńge kóleminde aıyppul salynyp, 3 eskertý berildi», - dedi oblystyq memlekettik eńbek ınspektsııasy basqarmasynyń basshysy Nurlan Telegenov.
Al byltyr Mańǵystaý oblysy boıynsha óndiriste 45 adam jaraqattanyp, 11 adamnyń ólimi tirkelgen.