Mańǵystaýda jer qoınaýyn paıdalanýshylardan 50 mln teńgeden astam qarjy óndirildi

<p>AQTAÝ. KAZINFORM &mdash; Mańǵystaý oblysynyń mamandandyrylǵan tabıǵat qorǵaý prokýratýrasy jergilikti atqarýshy organdardyń qyzmetine jer qoınaýy jáne jer qoınaýyn paıdalaný týraly zańnamanyń saqtalýyna tekserý júrgizdi.</p>

Tekserý barysynda, jekelegen jer qoınaýyn paıdalanýshylardyń (keń taralǵan paıdaly qazbalardy óndirýge quqyǵy bar) oblystyń áleýmettik-ekonomıkalyq damýyna aýdarymdar; qazaqstandyq qyzmetkerlerdi oqytý; taratý qoryn tolyqtyrý; qol qoıý bonýsyn tóleý sııaqty kelisimsharttyq jáne lıtsenzııalyq mindettemelerdi oryndamaý faktileri anyqtaldy.

«Bereshektiń jalpy somasy 400 mln teńgeden asty. Mysaly, jer qoınaýyn paıdalanýshy „D.A.B.“ júıeli túrde 4 jyl boıy (2019-2022 jyldary) Mańǵystaý oblysynyń áleýmettik–ekonomıkalyq damýyna jalpy somasy 9 mln teńgege aýdarym júrgizbegen. Osyǵan uqsas faktiler is júzinde barlyq jer qoınaýyn paıdalanýshylarda anyqtaldy», — dep jazdy vedomstvodan.

Qabyldanǵan prokýrorlyq qadaǵalaý sharalarymen búgingi tańda memleket kirisine 50 mln teńgeden astam qarajat óndirildi, 7 jer qoınaýyn paıdalanýshynyń keń taralǵan paıdaly qazbalardy óndirýge lıtsenzııalary qaıtaryp alyndy. Bereshekti óndirip alý jumystary, sonyń ishinde sot tártibimen jalǵasady.