Mańǵystaýda taǵy bir adam teńizge batyp, qaıtys boldy

<p>AQTAÝ. KAZINFORM &mdash; Qaıǵyly oqıǵa Aqtaý qalasynan 25 shaqyrymdaǵy shomylýǵa tyıym salynǵan &laquo;Shora&raquo; kanalynda boldy.</p>

9-maýsymda saǵat 18:56–da Mańǵystaý oblystyq tótenshe jaǵdaılar departamentiniń jedel kezekshisine atalǵan aýmaqta adam sýǵa ketti degen aqparat túsken.

Oqıǵa ornynda úgit-nasıhat jumystarynda júrgen qyzmetkerler baryp, sýǵa batyp bara jatqan er adamdy qutqardy. 1981 jyly týǵan azamat jaǵadan shamamen 25-30 metr qashyqtyqta qutqarylyp, jaǵaǵa shyǵaryldy.

Onyń aıtýynsha balasy sýǵa batyp ketken. Saǵat 21:30–da sýǵa batyp ketken 21 jastaǵy turǵynnyń denesi jedel qutqarý jasaǵynyń kúshimen, jaǵadan shamamen 130 metr qashyqtyqta, 2,5 metr tereńdikten tabyldy.

Sýǵa túsý maýsymy bastalǵaly bul ekinshi qaıǵyly oqıǵa. Osydan 4 kún buryn 2 jasar bala teńizge batyp, qaza tapty.