Mańǵystaýda tabıǵat ınspektorlary erekshe qusty fotoǵa túsirdi

<p>AQTAÝ. KAZINFORM &ndash; &laquo;Qyzylsaı&raquo; memlekettik óńirlik tabıǵı parki ınspektorlary &laquo;Tasorpa&raquo; memlekettik tabıǵı qaýmalynan erekshe qusty sýretke túsirip aldy.&nbsp;</p>

Tabıǵat ınspektorlary qaýmal aýmaǵyn qaraý kezinde fotoqurylǵyǵa aq tústi japalaqty túsirgenin málimdep otyr. Mundaı qus óńirde sırek kezdesedi. Al park basshysy Myńbergen Qarataýov aq japalaqty eki apta buryn baıqaǵanyn atady.

«Bul qustyń denesin aq túk basqan. Jumyrqadan shyqqanda soqyr bolyp týady. Atalǵan japalaq tárizdiler jándiktermen, kemirýshilermen qorektenedi. Biz 4 naýryz kúni «Qyzylsaı» parkine qarasty «Tasorpa» memlekettik tabıǵı qaýmalynan baıqap, sýretke túsirdik», - dedi «Qyzylsaı» memlekettik óńirlik tabıǵı parkiniń dırektory Myńbergen Qarataýov.

Erekshe japalaqtyń basy úlken, kózderi badyraıǵan, kóz burshaǵy qımylsyz, beti tegerishti, qaýyrsyndary óte jumsaq, ushqanda dybyssyz qanat qaǵady. Kemirýshilermen qorektenip, jemin túnde aýlaıdy. Uıasyn kóbine aǵashtyń qýysyna, keıde jerge salady. 

«Uıadaǵy jumyrtqalardyń sany dene mólsherine baılanysty 2-den 12-ge deıin jetedi. Al jumyrtqalardy analyǵy basady. 28 týysqa birigetin 133 túriniń Qazaqstanda 9 týysy, 12 túri kezdesedi. Olardyń 10-y uıa salady. Mamyr-maýsym aılarynda irileri 1-2-den, al maıda qustary 10-12-den jumyrtqa salyp, ony mekıeni 4 aptadaı basady. Balapandary 30 kúnde qanattanady», - dedi Myńbergen Qarataýov.

Buǵan deıin Mańǵystaýda «Qyzylsaı» memlekettik óńirlik tabıǵı parkiniń qorǵaýyndaǵy arqar, qaraquıryq basy kóbeıgeni habarlanǵan bolatyn. 

Sondaı-aq erekshe qorǵalatyn tabıǵı aýmaqta zańsyz ań aýlaǵan Beıneý aýdanynyń eki turǵynyn ınspektorlar anyqtady.