Mańǵystaýda munaı kompanııalarynyń basshylary ustaldy

<p>ASTANA. KAZINFORM - Mańǵystaý oblysynyń prokýratýrasy ýákiletti organdarmen birlesip munaı-gaz salasynyń jekelegen kásiporyndarynyń qyzmetinde tekserý júrgizýde, dep habarlaıdy óńirlik prokýratýranyń baspasóz qyzmeti.&nbsp;</p>

«Oıl Transport Korporeıshn» JShS laýazymdy tulǵalary bıýdjet qarajaty esebinen 700 mln teńgeden astam somaǵa merdiger kompanııanyń shyǵystaryn negizsiz ótegeni anyqtaldy.

Budan basqa, merdigerlerge naqty kórsetilmegen kólik qyzmetteri úshin 2,2 mlrd teńge aýdarylǵan.

Atalǵan buzýshylyqtar boıynsha Qylmystyq kodekstiń 189-babynyń 4-bóligi boıynsha (asa iri mólsherde jymqyrý) sotqa deıingi tergeý bastaldy.

Sondaı-aq, «QazMunaıGaz «UK» AQ enshiles uıymynyń 11 mln teńgesin jymqyrý faktisi boıynsha sotqa deıingi tergep-tekserý bastaldy.

«Oıl Transport Korporeıshn» JShS-niń burynǵy basshysy «T» ustaldy.

Qarajatty jymqyrý faktisimen QK-niń 189-babymen buryn bastalǵan sotqa deıingi tergep-tekserýler boıynsha «Oıl Transport Korporeıshn» JShS-niń óndiristik-tehnıkalyq bóliminiń bastyǵy, merdigerlik uıymdardyń 2 ókili ustaldy.

Prokýrorlyq tekserý bastalǵannan beri barlyǵy 19 sotqa deıingi tergeý bastaldy, olar Mańǵystaý oblysynyń ekonomıkalyq tergeý departamentiniń óndirisinde.

Bıýdjet qarajatyn jymqyrý jáne talan-tarajǵa salý faktileri boıynsha olardy tergeý sheńberinde 8 adam, onyń ishinde «Qazmunaıgaz «UK» AQ enshiles kompanııalarynyń 4 basshy laýazymyndaǵy tulǵalar ustaldy.

Tergeý múddesi úshin basqa málimetter jarııa etilmeıdi.