Mańǵystaýda qyrylǵan aqqýlar sany toǵyz júzge jýyqtady

<p>Úsh apta ishinde Qarakól kólinen 870 bas qus óleksesi tabyldy. Sonymen birge kól sýynyń quramynda lastaýshy zattardyń mólsheri asyp ketkeni anyqtaldy, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Óńirlik qoǵamdyq kommýnıkatsııa ortalyǵynda ótken brıfıngte oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Ǵabbas Dosatov 2023 jyldyń 21 jeltoqsanynan 9 qańtaryna deıin 870 aqqý óleksesi tabylyp, tolyǵymen joıylǵanyn atady.

«Qoryq ınspektorlary reıd barysynda aqqýlardyń ólekselerin tapty. Olar bul aqparatty barlyq qajetti sharalardy qoldana otyryp, jedel túrde tıisti organdarǵa berdi. Aqqýlardyń ólekselerinen alynǵan synama onyń qus tumaýy ekendigin rastady. Osyǵan baılanysty tıisti memlekettik organdar óz quzyreti sheńberinde arnaıy oryndarda ólgen qustardy jınaýmen jáne joıýmen aınalysady, - dedi Ǵabbas Dosatov.

Budan bólek, ekologtar Rixos qonaq úıiniń Qarakól aqqýlarynyń ólimine qatysyn teksergenin málimdedi.

«5-6 qańtarda Rixos Water World qonaq úıiniń aýmaǵynda ornalasqan qubyrdan belgisiz suıyqtyqtyń quıylý deregi boıynsha qosymsha monıtorıng júrgizildi. Qarakólge quıylatyn sý quramynda lastaýshy zattar mólsheriniń asyp ketýi anyqtaldy. Osy derekterdiń negizinde qonaq úıge qatysty tekserý taǵaıyndaldy, onyń nátıjeleri alda jarııalanady, - dedi Mańǵystaý oblysynyń ekologııa departamenti basshysynyń mindetin atqarýshy Maǵjan Ǵalymov.

Mańǵystaýlyq ekolog Ádilbek Qozybaqov óńir turǵyndaryna qustardy qoldan tamaqtandyrýdan bas tartýǵa keńes berip otyr.

«Qustarǵa qoldan azyq berýdiń qajeti joq. Óıtkeni olardyń tabıǵı jaǵdaıdaǵy qajetti qoregi jetkilikti. Qarakólde jyl saıyn kem degende 10-15 myń aqqý qystaıdy. Eki kún buryn ornıtolog mamandar 43 myńnan astam aqqýdy sanaǵan. Bul kól aýmaǵynba qustarǵa jetkilikti qorek bar ekenin kórsetedi. Mysaly, Avstralııada turatyn qara aqqýdyń qus tumaýyna múldem ımmýnıteti joq. Bizdiń aımaqtarǵa ushatyn aqqýlar da qus tumaýyna óte sezimtal. Ásirese ımmýnıteti qalyptaspaǵan qustyń jas balapandary álsiz keledi», - dedi Ádilbek Qozybaqov.

Ótken jyldyń qarasha aıynda Mańǵystaýǵa 7 myńǵa jýyq aqqý ushyp kelgen. Qazirgi ýaqytta Qarakóldegi aqqýlardyń sany 45 myń shamasynda bolyp otyr. Sonymen birge, Aqtaý qalalyq veterınarııalyq stantsııasynyń basshysy Samat Nábıev jyljymaly krematorıı arqyly qyrylǵan aqqýdy joıý jumystary jalǵasatanyn atady.