Mańǵystaýda Qaraturyn ken ornyndaǵy órt jyl sońyna deıin óshirilýi múmkin

<p>Qaraturyn ken ornyndaǵy uńǵymadaǵy apatty joıý jumystary jyl sońyna deıin aıaqtalady. Bul týraly jaýapty kompanııa ókilderi málimdedi, dep habarlaıdy Kazinform.</p>

9 maýsym kúni «Bozashy Munaı» JShS «Ońtústik Qaraturyn» munaı-gaz ken ornynda 1088 metr tereńdikten burǵylaý quralynyń kóterilýi saldarynan órt tutanǵan edi. 
Qyzyl jalyn áli kúnge óshirilgen joq.

Buǵan deıin mamandar ken ornyndaǵy órt qyrkúıekte sónýi múmkin dep boljam jasaǵan edi. 
Endi kompanııa jyl sońyna deıin órtti óshirýdi josparlap otyr.

Oryn alǵan jaǵdaıǵa oraı arnaıy shtab qurylyp, jumys júrip jatyr. Órttiń oshaǵyna bir tik, eki qıǵash uńǵyma qazyldy. Sonyń arqasynda uńǵymaǵa 40 myń tekshe metr sý jiberilip, apat bolǵan jerden gazdyń shyǵýy tómendegen.

Osylaısha apatty uńǵymanyń saǵasy tyǵyzdalmaq.

- Bizdiń qolymyzda jer astyndaǵy gazdyń qaı qabattan shyǵyp turǵany jóninde birde-bir aqpar bolmady. Qıǵash qazylǵan eki uńǵymanyń arqasynda geologııalyq aqparatqa qol jetkizdik. Biz osy ekinshi josparmen órtti aýyzdyqtaýǵa senimdimiz, - dedi "Bozashy munaı" JShS dırektorynyń orynbasary.

Aıta ketsek, ken ornyndaǵy órtten bir adam zardap shekken edi.