Mańǵystaýda bıznes sýbektileriniń 47 paıyzyn áıelder basqarady

<p>Mańǵystaýda bıznes sýbektileriniń 47 paıyzynda áıelder basshylyq jasaıdy. Bul týraly Aqtaýda ótken &ldquo;Asmar - birlik dástúrleri&rdquo; áıelder kásipkerliginiń halyqaralyq kongresinde aıtyldy, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</p>

Halyqaralyq kongresske Qyrǵyzstan, Germanııa, Ázirbaıjannan jáne elimizdiń barlyq óńirinen 370-ten astam adam qatysty.

- Mańǵystaý oblysynda 70 myńnan astam bıznes sýbektisi tirkelgen. Sonyń 47 paıyzynyń basshylary - qyzdar, áıel adamdar. Bul kóp nárseni ańǵartady jáne jalpy óńirlik túsimderdiń úlesi shaǵyn jáne orta bıznesten, sonyń ishinde áıelder basqaryp otyrǵan mekemelerden shyǵyp otyr. Bul memleket tarapynan kórsetilip jatqan qoldaýlarǵa sáıkes atqarylyp jatqan ister. Memleket basshysynyń bergen tapsyrmasyna sáıkes atqarylyp jatqan ister. Biz bul isterdi jergilikti atqarýshy organ ókilderi retinde jalǵastyramyz,- dedi Mańǵystaý oblysynyń ákimi Nurlan Noǵaev.

Sessııanyń birinshi bóliminde “Halyqaralyq áıelder qatynasy jańa múmkindikterge jol ashady". taqyryby talqylandy. Munda Qyrǵyzstan, Ázirbaıjan, Germanııadan kelgen halyqaralyq uıym ókilderi oılaryn ortaǵa saldy. Al sharanyń uıymdastyrýshylar mundaı bastama qyz-kelinshekter úshin asa mańyzdy ekenin aıtty.

- Eń birinshi maqsat - shaǵyn bızneste júrgen qyz-kelinshekterdi orta jáne úlken bızneske ósirý. Jańa ınstrýmentterdi iske qosý. Onyń ishinde qarjylyq qoldaý kórsetý, dedi “Asmar” Qazaqstan áıelder kásipkerligi ulttyq qaýymdastyǵynyń tóralqa tóraıymy
Lázzat Ramazanova.

Sondaı-aq kongresste eki ulttyq joba – "ALTYN OIMAQ" jáne "Bir aýyl - bir ónim" ónimderinen kórmesi jasaqtaldy. Óńirdegi jeńil ónerkásiptiń jáne aýyldardaǵy shaǵyn bıznes ókilderi Qazaqstannan tys jerlerge shyǵaryp otyrǵan óz buıymdaryn tanystyrdy.

- Áıel kásipkerler bıznes ınstrýmentterin alyp jatyr. Bizdiń baǵytymyz qandaı? Biz tsıfrlyq bızneske kóshýimiz kerek. Búgin osy taqyryp keńinen talqylanyp jatyr. Ár áıeldiń óziniń kásipte jeke tarıhy bar. Kim qalaı jetistikke ózi jetti? Bólisip jatyr. Áıel adamǵa kóp motıvatsııa kerek. Óıtkeni áıel adamnyń jasaıtyn jumysy kóp: qoǵamda da, úıde de. Sondyqtan kásipte jetekshi bolý úshin áıel adamǵa kómektesý kerek, dedi Mańǵystaý oblystyq isker áıelder keńesiniń tóraǵasy Sáýle Salıhova.

Kongress aıasynda "Asmar" Qazaqstan kásipker áıelder assotsııatsııasy, Ulttyq ekonomıka mınıstrligi jáne Mańǵystaý oblysy ákimdigi men Qazaqstan jeńil ónerkásip assotsııatsııalary yntymaqtastyq týraly memorandýmǵa qol qoıdy. Aıta keteıik, qazaqstandyq áıelder 1 mln-nan astam adam jumys isteıtin barlyq shaǵyn bıznes kásiporyndarynyń 44% - dan astamyn basqaryp otyr. Tek Mańǵystaý oblysynda áıelder qyzmet kórsetýden bastap aýyl sharýashylyǵyna deıin túrli salalardaǵy kompanııalarǵa jetekshilik etedi.