«Birlestik-2024» halyqaralyq oqý-jattyǵýy qorytyndylandy
Oqý-jattyǵýlar «Oımasha» polıgonynda jáne Toqmaq múıisindegi Kaspıı teńiziniń aýmaǵynda ótti.
Halıfat memleketin qurýǵa umtylǵan zańsyz qarýly qurylymdardy taýyp, olardyń kózin joıý jónindegi biryńǵaı oqý-jaýyngerlik tapsyrmalar «Oımasha» polıgonynda bastalyp, «Toqmaq» múıisine jaqyn teńiz ýchaskesinde jalǵasty.
Arnaıy operatsııany sátti júzege asyrýda jerden jáne áýeden barlaý qyzmetteri mańyzdy ról atqardy. Bandalyq qurylymdardyń bazalaryn tapqannan keıin, arnaıy maqsattaǵy toptar soqqy berý úshin armııalyq avıatsııaǵa koordınattardy tapsyrdy. Sonymen qatar, alǵy sheptegi bazalyq aımaqtardy, sodyrlardyń pozıtsııalaryn jáne olardyń baǵdary men qozǵalysyn izdeýdi jaýyngerlik ekıpajdar, Wing Loong, Orbiter jáne Puma ushqyshsyz ushatyn apparattaryndaǵy barlaý keshenderi júzege asyrdy.
Odan ári birikken áskerler tobynyń bólimsheleri barlaý júrgizip, mınaǵa qarsy qamtamasyz etý, aralyq bazany, qurlyqtaǵy jáne teńizdegi sodyrlardy joıý jumystaryn júrgizdi. Operatsııaǵa áskerı-teńiz desanty men áýe desanttary, shabýyldaý eshelondary, mobıldi-atys toby qatysty.
Shet elderden kelgen áskerı qyzmetshiler oqý-jattyǵýdyń joǵary deńgeıde uıymdastyrylǵanyn, áskerı tapsyrmalardy birge oryndaý arqyly úlken tájirıbe jınaǵandaryn aıtady.
- Oqý-jattyǵýdyń maqsaty — osy elderdiń áskerin biriktirip, jaýyngerlik tapsyrmalardy birge oryndaýǵa jumyldyrý bolatyn. Meniń oıymsha, kózdegen maqsatqa qol jetkizdik. Kelesi oqý — jattyǵýǵa da qýana qatysamyz, - deıdi Ázerbaıjan Respýblıkasynyń áskerı qyzmetshisi Sahıb Mamedov.
Qazaqstan Respýblıkasy Qorǵanys mınıstri general-polkovnık Rýslan Jaqsylyqov oqý-jattyǵýǵa qatysqan áskerı qyzmetshilerdiń jaýyngerlik ázirlikteri men qulshynystaryn erekshe atap ótti.
— Oqý-jattyǵý josparyn iske asyrý barysy naqty jaýyngerlik jaǵdaılarǵa jaqyn modeldendi. Qaıta toptastyrý jáne birikken áskerler tobyn qurý máseleleri pysyqtaldy. Taktıkalyq epızodtardy oryndaý kezinde ártúrli qarý-jaraq pen áskerı tehnıka qoldanyldy. Áskerı qyzmetshiler tapsyrmany sátti oryndap, jaýyngerlik jaǵdaıdaǵy ózara is-qımyldyń oń tájirıbesin aldy, — deıdi general-polkovnık Rýslan Jaqsylyqov.
Sharada Ázerbaıjan, Qyrǵyzstan, Ózbekstan Respýblıkalarynyń Qorǵanys mınıstrleri men Tájikstan Qarýly kúshteri Bas shtaby bastyǵynyń birinshi orynbasary da sóz sóılep, oqý-jattyǵýdy uıymdastyrýshylarǵa alǵys aıtty. Qatysýshy elder qarýly kúshteriniń yqtımal agressııalyq aktilerdi toıtarýǵa jaýyngerlik ázirligin odan ári nyǵaıtatyndaryn jetkizdi.
Oqý-jattyǵý qorytyndysy boıynsha birqatar áskerı qyzmetshi halyqaralyq yntymaqtastyqty damytýǵa qosqan úlesi úshin arnaıy medaldarmen marapattaldy.
Esterińizge sala keteıik, birlesken manevrler «Oımasha» oqý polıgonynda, Qaraqııa aýdanynyń Toqmaq múıisinde jáne Kaspıı teńiziniń qazaqstandyq akvatorııasynda ótkizildi. Oǵan tórt myń áskerı qyzmetshi, 700-ge jýyq qarý-jaraq pen áskerı tehnıka jumyldyryldy.