Mańǵystaýda asyl tuqymdy 40 eshkini qańǵybas ıtter qyryp ketti
– Bárin tek moınynan tistep, qyryp kete bergen. Eshqaısysyn jemegen. Іshinde bir eshkimniń qarnyn jarǵan. Qalǵanynyń báriniń tek moınynan tistep ketken. Osy eshkilerdi «Nur Kapıtal» baǵdarlamasymen, 15 eshkini 400 myńnan 6 mıllıon teńgege aldyrǵanmyn. Áli 7 aı tóleıtin qaryzym bar, - deıdi sharýashylyq ıesi Qumar Nurpeıisova.
Mal ıesi oqıǵa bolǵan kúndi qorqynyshpen eske alady. 29-shilde kúni tańǵy saǵat 6 shamasynda qoraǵa kelse, qyryq eshkiniń qyrylyp qalǵanyn kóredi. Qumar Nurpeıisova 5 buralqy ıttiń aýyl ishine qaraı qashqanyn baıqap, sońynan qýǵan. Biraq jete almaǵan.
Qyrylǵan eshkilerdiń ishinde asyl tuqymdy janýarlar arasyndaǵy kórmede júldeli bolǵan tólder de bar eken. Quny qymbat eshkiniń, naryqtaǵy baǵasy 400 myń teńgeden bastalady. Demek, 40 bas eshki shamamen – 15 mıllıon teńge turady. Eshkiler kúnine kem degende 50-60 lıtr sút beretin. Shyǵynǵa ushyraǵan kásipker endi ne isterin bilmeı otyr. Óıtkeni sharýashylyqty qolǵa alǵan kezde nesıe alǵan.
– Osy sharýashylyqpen aınalysyp jatqanyma 10 jyl boldy. Búkil Aqtaýdy, Munaılyny, aýyryp jatqan kisilerdi, kishkentaı balalardy, túgel qamtamasyz etip otyrdyq. Qurt, irimshik, úlken kisilerge qaımaǵyn tasyp otyrǵanmyn. Bir otbasynyń 9 adamyn asyrap otyrǵan eshkiler edi. Endi maǵan tym bolmaǵanda jartysynyń qunyn óteýge bolsa da kómektesse, taǵy eshki alyp, kásipti jalǵastyrar edim, - deıdi kásipker.
Munaıly aýdandyq kásipkerlik jáne aýyl sharýashylyq bólimi basshysynyń orynbasary Bekbolat Qabatbaevtyń aıtýynsha, shyǵynǵa ushyraǵan kásipkerdiń «Bir aýyl-bir ónim» jobasyna qatysyp, 5 mıllıon teńge grant utýyna múmkindigi bar eken.
– Aýyl sharýashylyq bólimi tarapynan jáne Batyr aýyldyq okrýgi mamandary jáne veterınarlyq stantsııa bólimi tarapynan AKT jasaqtalyp, tıisti basqarmalarǵa hat joldandy. Qazirgi tańda nátıjesin kútýdemiz. Atalǵan kásipkerlikti, sharýa qojalyqty qoldaý maqsatynda oblysymyzda «Bir aýyl-bir ónim» baǵdarlamasy aıasynda beriletin 5 mln grantqa, ıaǵnı jergilikti taýar óndirýshilerge arnalǵan kásipkerdi qoldaý maqsatynda, sol jobaǵa qatysýǵa yqpal jasap jatyrmyz, - deıdi Bekbolat Qabatbaev.
Eske sala keteıik, buǵan deıin buralqy ıtterge qatysty BQO veterınarııa basqarmasynyń bas mamany men Oral qalalyq veterınarııalyq stantsııasynyń dırektory Erlan Işanovtyń jáne taǵy da basqa mamandardyń pikirin jarııalaǵan bolatynbyz.
Sondaı-aq Ekologııa jáne tabıǵı resýrstar mınıstri Erlan Nysanbaev eldi mekenderde buralqy ıtterdiń kóbeıýi turǵyndarǵa qaýip tóndirip jatqanyn aıtqan edi. Sonymen qatar «Animal Law PıÝK «KazBar» komıtetiniń basshysy Olga Chentsova buralqy ıtterdi atý problemany sheshpeıtinin jetkizdi.