Mańǵystaýda arqarlar tóldep jatyr
Qazirgi ýaqytta «Manashy», «Tasorpa» memlekettik tabıǵı qaýmaldarynyń basshylary erekshe qorǵalatyn aýmaqtarǵa dala ańdarynyń kóktemgi jaı-kúıin baqylaý maqsatynda, fototuzaqtar ornatyp, aınalaǵa reıdtik is-shara jumystaryn júrgizip jatqanyn málimdedi.
Búginde parke tıesili 4 qaýmalda meken etetin arqarlar sany myńnan asqan. Tabıǵı ósim boıynsha túz janýarlary naýryzdyń sońynan mamyr aıyna deıin tóldeý kezeńi jalǵasady.
«Kóktem mezgiliniń orta tusy arqarlardyń tóldeıtin ýaqyty. Sondyqtan janýarlardyń tynyshtyǵy úshin barlyq tıisti jumystardy bizdiń parktiń ınspektorlary atqaryp jatyr. Táýlik boıy kezekshilikpen aýmaqta mototsıkl men kólikterdiń júrýine, dron ushyrýǵa tyıym salynǵan. Sondaı-aq, ańshylardyń myltyq atýyna tosqaýyl qoıylǵan. Baqylaý jumystaryn fototuzaqpen atqaryp otyrmyz. «Qyzylsaı» memlekettik óńirlik tabıǵı parkine 4 qaýmal, 1 park kiredi. Osy oraıda biz «Adamtas» qaýmalyna ǵana fototuzaq qurǵan joqpyz. Sebebi, teńiz jaǵasy bolǵandyqtan munda tek qustar ǵana bar. Qalǵan 3 qaýmal men 1 parkte arqarlardyń tóldeýi turaqty baqylanyp otyr. Olardyń naqty sany sáýir aıynyń sońynda belgili bolady», — dedi park dırektory Myńbergen Qarataýov.
Onyń aıtýynsha, «Qyzylsaı» memlekettik óńirlik tabıǵı parkindegi ótken jylǵy sanaq kezinde 1059 arqar bary anyqtalǵan. Bıyldan bastap olardyń sany edáýir kóbeıip otyr. Sondaı-aq, M.Qarataýov tabıǵat parkinde qaraquıryqtar mamyr aıynda tóldeı bastaıtynyn alǵa tartty.
Osyǵan deıin Mańǵystaýdaǵy «Qyzylsaı» tabıǵı parkinde arqar men qaraquıryq sany kóbeıgeni týraly derek málim bolǵan edi.
Byltyr óńirde arqar atqan brakonerler ustalǵan bolatyn.