Mańǵystaýda Amal merekesi qalaı toılandy
Amal — jyl basy sanalady. Bul kúni tańnyń atysymen jasy kishiler úlkenderge baryp kórisip, bir-birin quttyqtaıdy. «Bir jasyń qutty bolsyn», ıaǵnı «taǵy bir jylyńmen quttyqtaımyn» degen sózdi aıtyp, qol alysyp, qushaqtasyp amandasady. Bul dástúrdiń máni - qystan aman-esen ótip, kóktemdi qarsy alyp, jaqyn adamdarymen birge bolý múmkindigine shyn júrekten qýaný. Osy kezeńde kishiler úlkenderdiń amandyǵyn bilýge arnaıy barady.
13-14 naýryzda Mańǵystaýdyń eń bıik núktesi - Otpan taýda aqshańqaı úıler tigilip, torqaly toı ótedi. Aıta ketsek, Otpan taý Mańǵystaý oblysynyń ortalyǵy Aqtaý qalasynan 150 shaqyrym jerde, Mańǵystaý aýdany Shetpe kentiniń irgesinde jatyr. Jyldaǵy ǵuryp boıynsha bir-birimen kórisýge asyqqan jandar osynda jınalady.
Elimizdiń ózge óńirleri men alys-jaqyn shet elderden de qonaqtar keledi. Bıyl merekeniń mańyzyna erekshe mán berilip, basqa aımaqtardan Mańǵystaýǵa aǵylǵan jurttyń qarasy mol. Ár oblystan arnaıy shaqyrylǵan delegatsııa quramynda belgili el aǵalary, aqsaqaldar, ózge de qurmetti meımandar bar.
Qoldaǵy derekter boıynsha, Otpan taýǵa eki kúnde 30 myńnan astam adam jınaldy. Bas-aıaǵy 50-ge tarta kıiz úı tigilgen. Qalyptasqan dástúr boıynsha merekeni uıymdastyrý men ótkizýge jylda bir rý jaýapty. «Adaı ata - Otpan taý» tarıhı-mádenı kesheninde kontserttik baǵdarlama usynylady. Bul merekelik sharadaǵy basty rásimderdiń biri - «Birlik otyn» saltanatty túrde tutatý. Bıyl ony Muńal ata urpaqtary atqaryp, alaý estafetasy Qosaı Ata urpaqtaryna tapsyryldy.
Pedagogıka salasynda uzaq jyldar boıy eńbek etken Qazaqstannyń eńbek sińirgen ustazy Aldabergen Qurmashev bul kúndi urpaqtar sabaqtastyǵymen baılanystyrdy.
«Búgin biz erekshe merekege oraı dastarhanǵa jınaldyq, Amal merekesin qarsy alyp, kórisemiz. Bul mereke Jańa jyldyń bastaýyn bildiredi. Ejelgi ýaqytta bizdiń ata-babalarymyz aman-esen qystap shyǵyp, kóktemde qýana kórisken. Qazir zaman ózgergenimen, dástúrimiz ózgergen joq. Kishileri úlkenderge amandasyp, qonaqqa barsa, úlken kisiler olarǵa aqyl-keńesin aıtady, bul — urpaqtar sabaqtastyǵy, bizdiń ulttyq qundylyǵymyz. Bizdiń kúshimiz birlikte jáne bul qaǵıdany árqashan este saqtaý mańyzdy», — dedi Aldabergen Qurmashev.
Amalǵa Jambyl oblysynan arnaıy kelgen Nurıslam Esqalı Mańǵystaý jurtynyń toı toılaý úrdisine rıza bolǵandyǵyn jetkizdi.
«Men búgingi sharaǵa Jambyl oblysynan arnaıy kelip otyrmyn. Jalpy 362 áýlıe jerlengen kıeli mekenge aıaq basý erteden oıymda júr edi. Mańǵystaý óńiri halqynyń aýyzbirshiligi men Amal merekesin qarsy alýy meni tań qaldyrdy. Bolashaqta bul merekeni tek elimizdiń batys óńiri ǵana emes, búkil elimiz osylaı toılasa eken degen tilek-nıetimiz bar. Munda kún sál salqyn eken. Soǵan qaramastan, merekeni toılap jatqan halyqtyń yqylas-kóńili bizdi marqaıtty», — dedi Nurıslam Esqalı.
Al Aqtóbe oblysynan kelgen Amanjol Turǵynbaıuly Otpan taý basynda kópshilikpen toılanatyn erekshe kúnniń kóp deıin umytylmaıtynyn aıtady.
«Aqtóbe oblysyna qarasty Mártók aýdanynan keldim. Barsha halqymyzǵa Ulystyń uly kúni qutty bolǵaı. Aq mol bolyp, el-jurtymyzǵa qut-bereke darysyn. Ata-babalarymyz ańsap ketken egemendigimiz tuǵyrly, máńgilik bolǵaı dep tileımin. Tynyshtyǵymyz myzǵymaı, elimizdi ishki-syrtqy bále-jále, daý-damaıdan saqtaǵaı. Óskeleń urpaǵymyz sanaly bolyp jetile bersin», — dedi Amanjol Turǵynbaıuly.
Otpandaǵy Amal merekesi kezinde 4 balanyń tusaýy kópshilik aldynda saltanatty túrde kesildi.
«Qazaqta bala minezi men ustanymy onyń tusaýyn kesken adamǵa tartady degen senim bar. Biz balamyzdyń bolashaqta óz ornyn taýyp, talantty da bilimdi jan bolýyn qalaǵandyqtan, óńir basshysyna tusaýyn kestireıik dep sheshtik», — deıdi balalardyń biriniń anasy.
Tusaý kesý rásimin Mańǵystaý oblysynyń ákimi Nurlan Noǵaevpen birge jeńil atletıkadan KSRO-nyń eńbek sińirgen sport sheberi, Mańǵystaý oblysynyń týmasy Ámın Tuıaqov ta atqardy.
«Adaı ata - Otpan taý» tarıhı-mádenı kesheni aýmaǵynda 21 shaqyrym qashyqtyqqa at jarysy ótti. Jarysqa 15 shabandoz qatyssa, bas júldeni mańǵystaýlyq Esenǵalı Súıindikov, ekinshi oryndy Ashat Teleýgýsov, al tuǵyrdyń úshinshi satysyn Eraly Ibasov ıelendi. Bul synda birinshi oryn ıesine 3 mln teńge, ekinshi oryn úshin 1 mln teńge, úshinshi oryn úshin 500 myń teńge tabystaldy.
Sondaı-aq, Alaman báıgede 37 shabandoz bas júldege talasyp, tartysty dodada Munaıly aýdanynyń turǵyny Aman Jumamuratovtyń «Daý Kúreń» atty tulpary kómbege birinshi keldi. Al márege ekinshi bolyp aqtaýlyq Ańshybaevtar áýletiniń «Mýstang» tulpary turaqtady. Úshin oryn oraldyq Shangereı Muhamedjan jaratyp ákelgen júırikke buıyrdy. Alaman báıgeniń bas júldesi ıegerine avtokólik tabystalsa, ekinshi jáne úshinshi oryn ıegerleri 3 jáne 1,5 mln teńge aqshalaı syılyqtardy ıelendi.