Mańǵystaýda aqqýlardyń neden qyrylǵany belgili boldy

<p>Mańǵystaý oblysynda aqqýlardyń qyrylýyna baılanysty saraptamalyq qorytyndy shyqty, dep habarlaıdy <a href="Kazinform." target="_blank" rel="noopener">Kazinform.</a></p>

Mańǵystaý oblystyq orman şarýashylyǵy jáne janýarlar dúnıesi aýmaqtyq ınspektsııasynyń basshysy Ǵabbas Dosatov aqqýlardyń ólimine tikeleı qus tumaýy sebep bolǵanyn atady.

«Aqqýlardyń jappaı qyrylýynan keıin Almatydaǵy zerthanaǵa aparyp, tıisti saraptama jumystary júrgizildi. Tekserý nátıjesinde olardyń qus tumaýynan qyrylǵany belgili bolyp otyr. Bastapqyda qustardyń qyrylýy otyzǵa jýyq bolsa, keıin olardyń sany 50-60 aqqýdy qurady. Alda buǵan qatysty jaýapty tarap óz jumysyn júrgizedi», - dedi Ǵabbas Dosatov.

Al Mańǵystaý oblysynyń ekologııa departamenti Qarakól kólinen alynǵan sý synamalary lastaýshy zattardyń shekti ruqsat etilgen kontsentratsııasynan aspaǵanyn alǵa tartty.

«Departament mamandary Karakól aýmaǵynda sý synamalaryn tekserý kezinde shekten tys kontsentratsııasynan aspaǵanyn anyqtady. Bul rette kóldiń sýy qustar úshin eshqandaı qaýip tóndirmeıdi. Sondyqtan qustardyń qyrylýy kól sýymen baılanysty emes», - dedi Mańǵystaý oblystyq ekologııa departamentiniń baspasóz qyzmeti.

Taıaýda Mańǵystaý oblysynda erekshe qorǵaýdaǵy Qarakól kóliniń jaǵasynan otyzǵa jýyq aqqýdyń óleksesi tabylǵan edi. Keıin atalǵan iske qatysty tıisti saraptama jumystary taǵaıyndaldy.