Mańǵystaýda 21 mektep salynady, avtokólik joldary 96% jaqsarady

<p>Mańǵystaý oblysy birneshe jyl qatarynan bala týý qarqyny boıynsha rekord jańartty. Bul qosymsha bilim berý resýrstaryn qajet etedi. Atalǵan qajettilikti sheshý úshin oblys ortalyǵynda, eldi mekenderde de jańa mektep salý josparlanyp otyr. Bul týraly oblys ákimi Nurlan Noǵaev elordadaǵy esep berý brıfınginde aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Óńir basshysy qalalar men aýyldardy keshendi damytý jańa aýdandarmen qosa, qolaıly áleýmettik ınfraqurylymdy — balabaqshalar, mektepter, emhanalar, oıyn jáne sport alańdaryn da salýdy kózdeıtinin atap ótti.

Onyń málimetinshe, 2023 jyly bilim berý júıesin qarjylandyrýǵa 209 mlrd teńge qarastyrylǵan, bul – oblys bıýdjetiniń 43%-y.

«Oblysta 188 jalpy bilim beretin mektep jumys isteıdi, onyń 39-y — jekemenshik mektep. Sońǵy úsh jylda oqýshylar sany 25 myńǵa artyp, 182 myńdy kórsetti. Bıyl Aqtaý, Jańaózen, Munaılyda 3 972 oryndyq 11 jekemenshik mektep ashyldy. Ákimdik jetekshiligimen áleýmettik nysandar qatary artyp, ásirese mektepter qadamdyq qoljetimdilikte bolýy úshin tıisti jumystar atqarylyp keledi. Bul úshin qazirdiń ózinde bilim berý nysandaryn salý jáne keńeıtý qarqyndy júrip jatyr», - dedi N.Noǵaev Ortalyq kommýnıkatsııalar qyzmetinde.

Sondaı-aq «Aýyl-el besigi» baǵdarlamasy aıasynda Túpqaraǵan aýdanynda M.Gorkıı atyndaǵy mektep-lıtseıine japsarlas ǵımarat paıdalanýǵa berildi. «Jaıly mektep» ulttyq jobasy boıynsha oblysta 2025 jylǵa deıin 2 aýysymda 44 myń oryndyq 21 mektep salý josparlanǵan. 13 mektep boıynsha merdiger uıymdarmen kelisimsharttar jasaldy, qurylys jumystary bastaldy. 

Foto: Mańǵystaý oblysy ákimdigi

Bilim berý oshaqtarynyń qurylysyn salýdaǵy demeýshilik bilim berýdi damytýda mańyzdy ról atqarady. «NCOC» jáne «Buzachi Operating LTD» kompanııalary bul protseske belsendi qatysyp, mektep qurylysyna qarajat quıýda. Osylaısha, Beki aýylynda 100 oryndyq mektep, al C.Shapaǵatov aýylynda 1200 oryndyq mektep salynady.

«Áleýmettik ınfraqurylym áleýetin arttyrýda avtomobıl joldarynyń mańyzy asa zor. Sapaly joldar — óńir ekonomıkasynyń ózegi ekenin atap ótken jón. «Aýyl – el besigi» baǵdarlamasynyń basty baǵdary 21 aýyldy qamtıdy jáne bıyl avtojol salý jáne jóndeý jobalaryna qomaqty ınvestıtsııalardy tartý mańyzyn aıqyndaı túsedi. Bıyl oryndalǵan jumystar nátıjesinde jergilikti mańyzy bar avtomobıl joldarynyń jaı-kúıin 96%-ǵa deıin jaqsartý josparlanýda. Bul turǵyndar úshin qolaıly jaǵdaılardy qamtamasyz etýge jáne jalpy oblysty damytýǵa mańyzdy qadam bolmaq», - deıdi Nurlan Noǵaev.

Aıta keteıik, Nurlan Noǵaev Astanada Mańǵystaý oblysynyń bıylǵy áleýmettik-ekonomıkalyq damýy týraly esep berip jatyr.