Mańǵystaýda 17 baǵytqa halyqaralyq áýe reısi ashylǵan

<p>Mańǵystaý oblysyna jarty jylda 180 myń týrıst keldi, onyń ishinde 16 myń shetel azamattary bar. Ákim Nurlan Noǵaev óńirdiń týrıstik áleýeti týraly aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Bıylǵy 6 aıdyń nátıjesi boıynsha, bizdiń oblysqa 180 myń týrıst keldi. Onyń ishinde 16 myń sheteldik týrıst bar. Mamandardy daıarlaý, olardyń jatyn oryndaryn, saıahattaý marshrýttaryn uıymdastyrý jónindegi memlekettik organnyń qoldaýymen jeke kásipkerler de úlken qoldaý kórsetip júr. Basqa oblystardan kelgen kásipkerler de bizdiń oblysta týrızm salasyna qarajat salyp, jańa nysandar ashýda. Mysaly «Omir Glamping» nysanyn aıtýǵa bolady. Bul Kaspıı teńiziniń jaǵasynda, qorshaǵan ortaǵa zııansyz jáne azamattardyń júrip-túrýyna, teńizge shyǵýyna múmkindikter bar», - dedi N.Noǵaev Ortalyq kommýnıkatsııalar qyzmetinde.

Kelýshiler sanynyń artýymen oblysta 17 halyqaralyq jáne 8 ishki avıamarshrýttar istep tur. Ákimdiktiń habarlaýynsha, áýe qatynasy arqyly tasymaldanǵan jolaýshylar sany 1 mıllıonnan asqan.

«Sonymen birge, vızıt ortalyqtar salý, kıeli oryndarǵa jáne týrıstik nysandarǵa jol salý jónindegi máseleler nazarymyzda. Týrıstik múmkindigimizdi tanystyrý úshin bıyl Úkimet basshysynyń tóraǵalyǵymen, halyqaralyq týrızm salasyndaǵy mamandarmen jáne respýblıkadaǵy týrızm salasyndaǵy kásipkerlermen birigip, «Týrızmdi damytý jónindegi halyqaralyq forým» ótti. Sol jerde biraz ýaǵdalastyqtarǵa qol jetkizildi. Bul isti ári qaraı jalǵastyramyz», - dedi Nurlan Noǵaev.