Mańǵystaý turǵyndary eldi-meken irgesindegi mal sharýashylyǵynan shyqqan sasyq ıisten zardap shegip otyr
— Myna ıis qazir de sezilip tur, kúni-túni maza bermeıdi. Qazir qaıta qys aıy ǵoı erteń kóktemde tipti jaman bolady, jata almaımyz. Sosyn bularda túıe, taýyq, maldyń bári bar. Kóktemde tórt-túliktiń bárin shyǵaryp jiberedi, osy kóshede júredi, sosyn úıdiń aldynda júredi. Birde balamdy túıe qýyp, áreń qutqarǵanmyn, — deıdi turǵyndardyń biri Erkin Jeksenbıev.
Turǵyndardyń aıtýynsha, aýylda osy sharýashylyqtardyń kesirinen elektr jaryǵy álsiz. Saldarynan turmystyq tehnıkalary isten shyqqan.
— Saǵat 9 da apparat qosady, ne isteıtinin bilmeımiz shóp kese me álde, qaǵaz týraıdy ma? Sodan biz túngi 12-ge deıin jaryqty óshirip qoıamyz. Apparatyn óshirgende ǵana televızorymyzdy qosamyz. Áıtpese, kúıip ketedi. Bireýi kúıip, jaqynda nesıege taǵy bir televızor satyp aldym. Al, myna ıistiń kesirinen maska kıip júremiz, — deıdi aýyl turǵyny Álıma Nurmaǵanbetova.
Aýyl ákimdiginiń málimetinshe, eldi-mekenniń irgesinde 4-5 qosalqy sharýashylyq bar. Solardyń biri 60-qa jýyq jylqyny qoradan shyǵarmaı ustap, bordaqylap jatyr. Maldyń qıyn shyǵarmaı, jınap qoıǵan. Jaǵymsyz ıis sodan bolyp shyqty.
— Jańa turǵyndardyń kózinshe, eskertý aıtyldy. Eki kún dep edik, bizden bir apta ýaqyt surady. Endi 1 aptanyń ishinde sharýashylyqty tazalaıtyn boldy. Biraq biz sanıtarlyq epıdemıologııalyq baqylaý departamentine habarlama berip, teksertemiz. Qosalqy sharýashylyq bolǵasyn, qansha mal ustaýǵa bolatynyn qarap, shara qoldanamyz, — deıdi Qyzyltóbe aýyldyq okrýgi ákiminiń orynbasary Naýryzbek Súıit.
Buǵan deıin, almatylyqtar qolqany qapqan sasyq ıisten qurqarýdy ótinip, ákimnen kómek suraǵanyn jazǵan bolatynbyz.