Mańǵystaý óńiriniń aýdandaryna ǵaryshtan monıtorıng jasalady

<p>Mańǵystaý oblysynda zańsyz qoqys shyǵarý máselesi ózekti kúıinde qalyp otyr. Birneshe jyl buryn Aqtaý jáne Jańaózen qalalarynda, sondaı-aq olardan 50 shaqyrym radıýsta zańsyz qoqys oryndaryn anyqtaý úshin ǵaryshtan túsirilim jasaý iske qosyldy. 2024 jyldan bastap mundaı túsirilimder aýdan ortalyqtarynda da júrgiziletin bolady.&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;bul týraly óńir ákimdiginiń baspasóz qyzmetine silteme jasap habarlaıdy.</p>

Ǵaryshtan júrgizilgen monıtorıng nátıjesinde bıylǵy mamyr aıynyń basynan óńir aýmaǵynda 111 polıgon tabyldy, onyń 9 – Aqtaýda, 66 – Jańaózende, 30 – Munaıly aýdanynda, 6 –Túpqaraǵan aýdanynda. Qazirgi ýaqytta beıbereket qoqys alańdarynyń 84-i joıyldy, bul josparlanǵan jumystardyń 76% quraıdy.

«Aǵymdaǵy jyldyń qazan aıynda Jańaózende ruqsat etilmegen qoqys úıindilerin tazartý úshin «Asu Oil Trade» JShS merdigerimen 170 mıllıon teńge somasyna kelisimshart jasaldy. Olar 35 gektar aýmaqta 13 380 tonna qoqysty óńdeýi qajet. Sondaı-aq jeltoqsan aıynda Aqtaýda ruqsat etilmegen qoqys qoımalaryn tazartý jumystary úshin sol merdigermen 84 mıllıon teńgege kelisimshartqa qol qoıyldy. Munda 2,5 gektar aýmaqta 40 000 tonnany óńdeý josparlanǵan», - delingen ákimdik málimetinde.

Ákimshilik quqyq buzýshylyq týraly kodekstiń 505-babyna sáıkes 2021 – 2023 jyldar aralyǵynda 99 adam jalpy somasy 4 524 000 teńgege aıyppul tóleýge mindettelgen. Sondaı-aq osy kodekstiń 434-babynyń 2-tarmaqshasy boıynsha 7 461 adamǵa jalpy kólemi 88 738 000 teńge aıyppul tóleý júkteldi.

Oblys ákimi Nurlan Noǵaev ákimdikte zańsyz qoqys úıindilerin joıý boıynsha keńes ótkizdi. Aıtýynsha, ártúrli jerlerde paıda bolatyn polıgondar óńir aýdandarynyń syrtqy kelbetine ǵana emes, qorshaǵan ortaǵa da keri áser etýi múmkin. Sol sebepti árbir turǵyndy bul máselege jaýapkershilikpen qaraýǵa shaqyrdy.