Mańǵystaý oblystyq Bilim basqarmasynyń basshysy óńirdegi sybaılas jemqorlyq máselesi týraly aıtty

<p>Mańǵystaý oblystyq Bilim basqarmasynyń basshysy Dınara Jumasheva Aqtaý qalalyq bilim bólimi basshysynyń paramen ustalǵanyna baılanysty sybaılas jemqorlyqtyń aldyn alý sharalary týraly aıtyp berdi. Ol mekeme basshylaryn ýaqytsha qamaý ortalyǵyna aparyp kórsetkenin jetkizdi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Oblystaǵy barlyq bilim berý uıymdarynyń basshylarymen jylyna 2 ret dástúrli túrde quqyq qorǵaý organdary basshylarynyń qatysýymen jınalys ótkiziledi. Sybaılas jemqorlyqqa qarsy agenttiktiń Mańǵystaý oblysy boıynsha departamentimen birlesken is-sharalar jospary jasaqtaldy. Bilim berý uıymdarynda sybaılas jemqorlyqtyń aldyn alý boıynsha standart jasaldy. Oǵan qosa mekeme basshylaryn arnaıy kestemen ýaqytsha qamaý ortalyǵyna aparyp kórsettik», - dedi Mańǵystaý oblystyq Bilim basqarmasy basshysy Dınara Jumasheva.

Sondaı-aq Bilim basqarmasy basshylyǵy bilim bólimderiniń jáne bilim berý uıymdarynyń basshylarymen ótkiziletin májilisterde sybaılas jemqorlyqtyń aldyn alý sharalary, zań buzýshylyqtarǵa jol bermeý áreketteri týraly eskerip otyrǵan.

Aldaǵy ýaqytta da bul baǵyttaǵy jumystardy jalǵastyrmaq. Eske salsaq, Aqtaý qalalyq bilim bóliminiń basshysy paramen ustalǵan edi. Oblystyq Bilim basqarmasynyń basshysy bul jaǵdaıǵa qatysty pikir bildirmedi.

«Aqtaý qalasynyń bilim bóliminiń basshysyna qatysy máselege kelsek, mán-jaıdy quzyrly organdardan anyqtaý durys dep oılaımyn», - dedi ol.