Mańǵystaý oblysynda 36 adam tamaqtan ýlanyp aýrýhanaǵa tústi

<p>AQTAÝ. KAZINFORM - Beıneý aýdanynda qoǵamdyq tamaqtaný ortalyǵynda as ishken 36 adam ýlanyp, onyń 28-i aýrýhanaǵa jatqyzyldy.</p>

Mańǵystaý oblystyq Densaýlyq saqtaý basqarmasynyń málimetinshe, 8 adamǵa medıtsınalyq kómek kórsetilgennen keıin ambýlatorııalyq em taǵaıyndalǵan.

Dárigerlerdiń aıtýynsha, aýrýhanaǵa jatqyzylǵan naýqastardyń jaǵdaıy ortasha aýyr dep baǵalanyp otyr. Ýlanǵandar aýdan ortalyǵyndaǵy «Alı-Man» atty dámhanada tamaqtanǵan. 22 aqpannan bastap atalǵan qoǵamdyq tamaqtaný ornynyń qyzmeti ýaqytsha toqtatyldy.

«Naýqastarǵa oblystyń bas ınfektsıonıst-dárigerimen telemedıtsına arqyly konsılıým uıymdastyrylyp, tıisti em-dom taǵaıyndaldy. Beıneý aýdandyq kópsalaly aýrýhanasy dári-dármekterdiń jetkilikti qorymen qamtamasyz etilip, qosymsha 20 adamǵa oryn daıyndalady. Ambýlatorııalyq em alatyn naýqastarǵa qajetti bakterııaǵa qarsy jáne sımptomatıkalyq em taǵaıyndaldy. Qazir osyǵan baılanysty epıdemııalyq sharalar jalǵasyp jatyr», - dep jazylǵan Mańǵystaý oblystyq Densaýlyq saqtaý basqarmasyny baspasóz qyzmeti taratqan aqparatta.

Sonymen birge, jappaı tamaqtan ýlaný deregi boıynsha Mańǵystaý oblysynyń Sanıtarııalyq-epıdemıologııalyq baqylaý departamenti tergeý júrgizip jatqanyn málimdedi.