Mańǵystaý oblysy Túpqaraǵan aýdanynyń ákimi taǵaıyndaldy

<p>ASTANA. KAZINFORM &mdash;&nbsp;Erjan Kúmisqalıev Mańǵystaý oblysy Túpqaraǵan aýdanynyń ákimi boldy, dep habarlaıdy oblys ákimdiginiń baspasóz qyzmeti.</p>

Búgin, 30 jeltoqsan kúni Mańǵystaý oblysynyń ákimi Nurdáýlet Qılybaı Túpqaraǵan aýdandyq máslıhatynyń depýtattaryna QR Prezıdenti Ákimshiligimen kelisilgen aýdan ákimi laýazymyna osyǵan deıin Munaıly aýdanynyń ákimi bolǵan Erjan Kúmisqalıetiń kandıdatýrasyn usyndy. 

Foto: Mańǵystaý oblysynyń ákimdigi

Erjan Kúmisqalıev 1983 jyly týǵan. Bilimi joǵary. 2003 jyly M. Áýezov atyndaǵy Ońtústik Qazaqstan memlekettik ýnıversıtetin quqyqtaný mamandyǵy boıynsha támamdaǵan. 

Eńbek jolyn 2007 jyly Jańaózen qalasynda muǵalim bolyp bastaǵan.

2007-2008 jyldar aralyǵynda Jańaózen qalasynyń № 3 orta mektebi dırektorynyń oqý-tárbıe jumystary jónindegi orynbasary boldy.

2008-2016 jyldar aralyǵynda Mańǵystaý oblystyq ishki saıasat basqarmasynyń ákimshilik-quqyqtyq bóliminiń bas maman-zańgeri jáne ákimshilik-quqyqtyq bóliminiń basshysy, basqarmanyń ákimshilik bóliminiń basshysy, basqarma basshysynyń orynbasary laýazymdaryn atqardy.

2016-2019 jyldary Qaraqııa aýdany ákiminiń orynbasary boldy.

2019-2021 jyldar aralyǵynda Mańǵystaý oblystyq ishki saıasat basqarmasynyń basshysy laýazymyn atqardy.

2021-2022 jyldary Munaıly aýdany ákiminiń orynbasary laýazymynda jumys istedi.

2022 jyldyń sáýir aıynan bastap osy kúnge deıin Munaıly aýdany ákimi qyzmetin atqardy.

Depýtattar usynylǵan kandıdatýrany qoldady. Olar Erjan Kúmisqalıetiń tájirıbeli basqarýshy retinde biletinderin aıtyp, senim bildirdi.

Aımaq basshysy osy kúnge deıin Túpqaraǵan aýdanynyń ákimi bolǵan Rahat Eltızarovtyń jumysyna alǵys aıtyp, jańa ákimniń jumysyna sáttilik tiledi. 

Eske salsaq, osyǵan deıin Rýslan Bazarbaev Abaı oblysy ákimi apparatynyń basshysy bolyp taǵaıyndaldy.