Mańǵystaý halqy negizinen jer men qurylys salasyndaǵy jemqorlyqqa jıi shaǵymdanady

<p>Aqtaýda óńir basshysy Nurlan Noǵaevtyń tóraǵalyǵymen sybaılas jemqorlyqqa qarsy is-qımyl jónindegi komıssııanyń otyrysy ótti, dep habarlaıdy <a href="https://kaz.inform.kz/" target="_blank" rel="noopener">Kazinform</a> oblys ákiminiń baspasóz qyzmetine silteme jasap.&nbsp;</p>

Mańǵystaý oblysy boıynsha sybaılas jemqorlyqqa qarsy qyzmet departamenti basshysynyń birinshi orynbasary Birjan Haırýllın baıandama barysynda sybaılas jemqorlyqqa qarsy kúres aıasynda oblysta komplaens-qyzmetter júıesi belsendi damyp kele jatqanyn atap ótti.

Qazirgi ýaqytta komplaens máselesimen aınalysatyn 98 maman jergilikti jáne ortalyq organdarda jumys isteıdi.

Sybaılas jemqorlyqqa qarsy komplaens — kvazımemlekettik sektor sýbektileri men onyń qyzmetkerleriniń sybaılas jemqorlyqqa qarsy is-qımyl jónindegi zańnamany saqtaýyn qamtamasyz etetin fýnktsııa.

Memlekettik qyzmet isteri agenttiginiń Mańǵystaý oblysy boıynsha departamentiniń basshysy Toqtamys Jumaǵulov toǵyz aı ishinde memlekettik qyzmet kórsetý salasyndaǵy monıtorıng pen baqylaý nátıjesi týraly esep berdi.

Esepti kezeńde memlekettik qyzmetterdiń sapasy boıynsha júrgizilgen 20 baqylaý sharasynyń nátıjesinde 5 126 quqyq buzýshylyq anyqtaldy. Onyń 23,7% jergilikti atqarýshy organdarǵa qatysty. 

Tártiptik jaýapkershilikke 64 qyzmetker tartylǵan. 

Ákimshilik kodekstiń 465-babyna sáıkes departament zertteý júrgizip, 12 ákimshilik hattama jasady.

Osylaısha memleket paıdasyna jalpy somasy 603 750 teńge aıyppul óndirildi.

Shaǵymdardyń eń kóp bóligi jer qatynastaryna tıesili — 42,4%, sondaı-aq 24,2% — sáýlet jáne qala qurylysy salalaryna qatysty.

Sáýlet salasyndaǵy shaǵymdardy qaraǵannan keıin departament 4 ákimshilik is qozǵap, aıyppul óndirdi.