Mańǵystaý ákimi: Ǵylymı yntymaqtastyqqa baǵyttalǵan barlyq bastamany qoldaýǵa daıynbyz

<p>ASTANA. KAZINFORM&nbsp;&mdash; Mańǵystaý oblysynyń ákimi QR Prezıdentiniń keńesshisimen kezdesti, dep habarlaıdy óńir ákimdiginiń baspasóz qyzmeti.</p>

Mańǵystaý oblysynyń ákimi Nurdáýlet Qılybaı QR Prezıdentiniń ǵylym jáne ınnovatsııalar máseleleri jónindegi keńesshisi Kúnsulý Zakarııamen kezdesti. Bas qosýdyń negizgi maqsaty — óńirdiń áleýmettik-ekonomıkalyq máselelerin ǵylymı turǵyda sheshý jáne birlesken jobalardy damytý boıynsha ózara yntymaqtastyqty nyǵaıtý.

Nurdáýlet Qılybaı kezdesý barysynda Mańǵystaý oblysynda ǵylymı jobalardy qoldaýǵa baǵyttalǵan jumystarǵa toqtaldy. Óńirlik ǵylymı keńes 2023 jyldyń maýsym aıynda qurylyp, onyń quramyna 30-ǵa jýyq maman — iri kásiporyn basshylary, jergilikti professorlar, ekologtar jáne IT salasynyń ókilderi endi. Keńes aldaǵy ýaqytta halyqaralyq ǵylymı qaýymdastyqpen birlesip, óńirdegi ózekti máselelerdi sheshý úshin ǵylymı zertteýlerdi júzege asyrýdy kózdeıdi.

Jıynda oblys ákimi Nurdáýlet Qılybaı ǵylymı yntymaqtastyqqa baǵyttalǵan barlyq bastamany qoldaýǵa daıyn ekenin atap ótti.

— Ǵylymǵa salynǵan ınvestıtsııa — bolashaqqa salynǵan ınvestıtsııa. Bizdiń maqsatymyz — óńirdegi ózekti máselelerdi ǵylymı ádistermen sheship, jańa tehnologııalardy engizý arqyly Mańǵystaýdyń ekonomıkalyq jáne ekologııalyq áleýetin arttyrý. Biz óz tarapymyzdan ǵylymı yntymaqtastyqqa baǵyttalǵan barlyq bastamany qoldaýǵa daıynbyz, — dedi Nurdáýlet Qılybaı.

Aıta keteıik, Mańǵystaý oblysyna sapary barysynda Kúnsulý Zakarııa «Gasyr» ınnovatsııalyq fızıka-matematıkalyq lıtseıiniń jumysymen tanysyp, lıtseı oqýshylary men ujymymen kezdesý ótkizedi.

Buǵan deıin Mańǵystaý oblysynyń ákimi Bozjyra shatqalynda qonaq úı salynbaı qalǵanyna ókinetinin aıtqan bolatyn.