«Máńgilik el» tujyrymdamasy barsha qazaqstandyqtardy uıystyrýy qajet - Májilis depýtaty

ASTANA. QazAqparat - Elbasy Nursultan Nazarbaev usynǵan «Máńgilik el» ıdeıasy barsha qazaqstandyqtardy uıystyrýy qajet. Bul pikirdi QazAqparat tilshisine QR Parlamenti Májilisiniń depýtaty Anatolıı Bashmakov Qazaqstan Prezıdentiniń Ulytaýdaǵy suhbatyna oraı bildirdi.

«Qasıetti qazaq jeriniń birine aıaq basqan Elbasy bizdiń memleketimizdiń bolashaǵy men búgingi jaıynda eń aldymen jas urpaqqa keleli oı aıtty», - dedi halyq qalaýlysy.

A.Bashmakovtyń sózine qaraǵanda, Memleket basshysy qozǵaǵan keleli oılardyń barlyǵy da ózi usynǵan «Máńgilik el» tujyrymdasynan shyǵyp jatty.

«Men bul ıdeıany memleket quraýshy bir etnosqa ǵana qatysty fılosofııa ne bolmasa ıdeologııa retinde qarastyrmaımyn. Ol bárimizge de ortaq. Iá, bul ıdeıanyń túp tamyry qazaq halqynyń dástúri men tarıhynan bastaý alatyndyǵy sózsiz. Biraq, bul ıdeıanyń aıasy óte keń», - dedi ol.

Onyń atap ótýinshe, júzdegen jyldar boıy tarıhı Qazaq elimen qabysqan barlyq ulttardyń salt-dástúrin, ádet-ǵurpyn ustanyp, damytýǵa Qazaqstanda barlyq jaǵdaı jasalyp otyr.

«Sondyqtan da osynaý «Máńgilik el» fılosofııasy barsha qazaqstandyqtardy biriktirýi tıisti», -dedi A.Bashmakov.