«Máńgilik el»: Tuńǵysh elordalyq «Mindet, Abyroı, Erlik!» áskerı-patrıottyq forýmy ótti

ASTANA. QazAqparat - Astanada Memleket basshysynyń «Qazaqstan joly-2050: Bir maqsat, bir múdde, bir bolashaq» atty Qazaqstan halqyna Joldaýyn iske asyrý sheńberinde «Mindet, Abyroı, Erlik!» dep atalatyn alǵashqy elordalyq áskerı patrıottyq forým bolyp ótti. Forýmdy «Nur Otan» HDP «Jas Otan» jastar qanaty uıymdastyrdy, dep habarlaıdy Qorǵanys mınıstrliginiń baspasóz qyzmetinen.

Jıynǵa QR Qarýly Kúshteri merzimdi qyzmettiń áskerı qyzmetshileri, 10-11 synyptardyń oqýshylary, joǵary oqý oryndarynyń stýdentteri, áskerı-patrıottyq klýbtardyń músheleri qatysty.

«Búgingi kúni bizdiń árqaısymyz ýaqyt tezine baǵynyp, Qazaqstandyq patrıotızm ulttyń rýhanı ózegi, progressıvti qoǵamnyń qalpy ekenin tereń túsinýimiz kerek. Jastar - bolashaq Qazaqstannyń bastaýshy kúshi, aǵa urpaqtyń laıyqty izbasary. Joǵarǵy Bas qolbasshy Nursultan Nazarbaev Qazaqstan halqyna Joldaýynda atap ótkendeı, «Máńgilik el» - bul bizdiń jalpyqazaqstandyq úıimizdiń ulttyq ıdeıasy, ata-babamyzdyń armany», - dedi QR QK Bas shtaby bastyǵynyń orynbasary polkovnık M.Talasov.

QR Qorǵanys mınıstrliginen forýmǵa qatysýshylar úshin 68665 áskerı bólimi qurmetti qaraýyl rotasynyń saptyq is-qımyldarynyń ádis-tásilderin kórsetip, atys qarýlary men áskerı kıim-keshek kórmesin uıymdastyrdy. Sondaı-aq mınıstrliktiń Ortalyq áskerı orkestri de kópshilik nazaryna óz ónerlerin usyndy.

Forým qorytyndysy boıynsha jastardy áskerı-patrıottyq jáne Otanǵa degen súıispenshilik rýhynda tárbıeleýge aýqymdy úles qosyp kele jatqan alǵashqy áskerı daıarlyq pániniń oqytýshylary QR Qorǵanys mınıstrliginiń gramotalarymen marapattaldy.