«Máńgilik El» poıyzy - Qyzylorda qalasynda

QYZYLORDA. QazAqparat- Qazaqstan Respýblıkasy táýelsizdiginiń 25 jyldyǵy aıasynda jolǵa shyqqan «Máńgilik El» poıyzy Qyzylorda qalasynda boldy. Oblys ákiminiń orynbasary Ǵalymjan Ámireev pen qala ákiminiń orynbasary Aıdyn Qaırýllaev bastaǵan Syr óńiriniń turǵyndary poıyz jolaýshylaryn sán-saltanatpen kútip aldy. Temirjol vokzalyna jınalǵan turǵyndarǵa poıyz músheleri sharanyń mańyzyn túsindirdi.

Sodan keıin delegatsııa músheleri Asqar Toqmaǵambetov atyndaǵy qalalyq mádenıet úıinde memlekettik qyzmetkerlerdiń, túrli sala basshylary men qala turǵyndarynyń qatysýymen ótken jıynda boldy. Jıyn barysynda «Máńgilik el» poıyzy shtabynyń jetekshisi, Qazaqstan halqy Assambleıasynyń múshesi Ámirjan Álpeıisov, Astana qalasynyń «Qoǵamdyq kelisim ortalyǵy» dırektory Talǵat Jaqııanov sóz alyp, «Máńgilik El» ıdeıasyn, QR Prezıdenti N.Á.Nazarbaevtyń «Qazaqstan jańa jahandyq ahýalda: ósim, reformalar, damý» atty Qazaqstan halqyna Joldaýyn, «100 naqty qadam» Ult josparyndaǵy Elbasynyń alǵa qoıǵan basty mindetter men maqsattaryna toqtaldy. Odan keıin qonaqtar josparǵa sáıkes jumystaryn jalǵastyrdy.

Oblystyq dıagnostıkalyq ortalyqta medıtsına mamandary turǵyndardy qabyldap, tegin keńes berýde. Al Halyqqa qyzmet kórsetý ortalyǵynda sala mamandary memlekettik qyzmet túrlerin tıimdi paıdalaný joldarymen bólisti. Sonymen qatar qala turǵyndary orta jáne kishi kásipkerlikti damytý baǵdarlamalary boıynsha suraqtaryna jaýap aldy.
Qonaqtar №278 orta mekteptiń túlekterimen kezdesý ótkizip, «Máńgilik el jastary - ındýstrııaǵa!» baǵdarlamasyn túsindirdi. Ary qaraı «Qyz Jibek» meıramhanasynda ótken múgedek balalarǵa arnalǵan qaıyrymdylyq aktsııasyna qatysty.