«Máńgilik El» - máńgilik táýelsizdik balamasy

ASTANA. QazAqparat - Memleket basshysy Nursultan Nazarbaevtyń ár bir ózindik qundylyǵy, ıdeıasy men mańyzy bolady. Osydan eki jyl burynǵy Qazaqstan halqyna arnalǵan «Qazaqstan joly - 2050: bir maqsat, bir múdde, bir bolashaq» atty Joldaýy boıynsha Prezıdenttiń jalpyulttyq ıdeıasy - bolashaq tabystardyń negizi ekeni basa aıtyldy.

Al eń bastysy - elimizdiń rýhyn kóteretin, uly maqsattarǵa jetkizetin «Máńgilik el» ulttyq ıdeıasy jarııalandy. «Máńgilik el» ıdeıasy - elimizdi óz maqsatyna talaı dáýir synynan súrindirmeı jetkizetin tuǵyrly ıdeıa.  Bul ıdeıa kópshilik tarapynan birden qoldaý tapty.   

     Shynynda, qaı el, qaı halyq bolmasyn jer betinde máńgi jasaýǵa umtylady. Eýrazııanyń ortasynda ulan-baıtaq jeri bar, mıllıondaǵan adam sóıleıtin tili bar, qasıetti dini bar halqymyzǵa sońǵy 2,5 ǵasyrda jetpegeni - Táýelsizdik edi. Alaıda, ǵalamdyq jahandaný dáýirinde alystaǵy alpaýyt memleketterdiń áseri kúsheıe túsýde. Ony álemde sońǵy kezderde bolyp jatqan oqıǵalar men protsester aıǵaqtaýda.

Sondyqtan Máńgilik El sózi - Máńgilik táýelsizdik uǵymymen astasady.

«Qazaqstan - 2050» strategııasy - qalyptasqan memlekettiń jańa saıası baǵytyn aıqyndady. Qazaqstan álemniń damyǵan otyz memleketiniń qataryna kirýdi maqsat etip qoıdy. 15 jyl ishinde qazaqstandyqtardyń tabysy 16 ese ósti, tabysy kúnkórisi deńgeıinen tómen azamattardyń sany jeti ese azaıdy, jumyssyzdar sany eki ese qysqardy.

«Qazaq eli», «Máńgilik el» degen ataýlar bir-birimen mazmundas, bir eldiń taǵdyryna baılanysty oılardy jınaqtap kórsetetin uǵymdar. Saıası, áleýmettik, ulttyq sana qalyptasty. Osy negizde eldiń jeri men sýy, tabıǵı baılyǵy, tili men dini bir baǵytta damyp, Táýelsiz Qazaqstandy jańa tabystarǵa jeteledi. Bular ulttyq memleket qurý men qalyptastyrý jolynda aıryqsha mańyzdy ról atqardy.

      1993 jyly 28 qańtarda Qazaqstan Respýblıkasynyń Joǵarǵy Keńesi eldiń negizgi zańynyń mátinin qarap - Táýelsiz Qazaqstannyń alǵashqy  Konstıtýtsııasyn qabyldady. Jańa Konstıtýtsııanyń ereksheligi - onyń Qazaqstandy dúnıejúzilik qaýymdastyqtyń ajyramas bóligi dep jarııalaýy edi. Osylaısha, Qazaqstan halyqaralyq normalar men demokratııalyq jáne quqyqtyq memleket qurýǵa baǵyt alǵanyn barsha álemge jarııa etý arqyly «Máńgilik El» bolýǵa negiz qalady.

    «Máńgilik el - ata-babamyzdyń san myń jyldan bergi asyl armany ekenin barlyǵymyz bilemiz. Ol arman álem elderimen terezesi teń qatynas quratyn, álem kartasynan oıyp turyp oryn alatyn táýelsiz memleket ataný edi. Ol arman turmysy baı qýatty, tútini túzý shyqqan, urpaǵy erteńine senimmen qaraıtyn baqytty el bolý edi. Máńgilik eldiń irgesin qaladyq. Biz úshin bolashaǵymyzǵa baǵdar etip ultty uıystyra uly maqsattarǵa jeteleıtin ıdeıa, ol qa­lyptasqan memleketiń - «Máńgilik El» ıdeıasy.

    Bir sózben aıtqanda, «Máńgilik El» ıdeıasyn ulttyq ıdeıa retinde qabyldaý búgingi Qazaqstan damýynyń ishki qajettiginen, memlekettiń tutastyǵyn saqtaý ıdeıasynan týyndap otyrǵany sózsiz. Bul ıdeıa táýelsiz memleket aldynda turǵan basty suraqqa jaýap berip, ulttyń bolashaqtaǵy damýyna jaǵymdy áser etýi tıis. Sonymen birge, ulttyq ıdeıa aldyńǵy qatarly qurylyp jatqan zertteý ýnıversıtetterdiń damý josparlarynyń negizgi baǵyttarynyń biri bolýy kerek.  Mine, osy turǵydan kelgende, «Máńgilik El»  ulttyq ıdeıasy Qazaqstan halqyn biriktiretin, eldiń basty maqsatynan shyǵatyn jáne soǵan tolyq jaýap beretin ıdeıa.