«Máńgilik El» qundylyqtary júıesin nyǵaıtýǵa baǵyttalǵan zań jobasy Senattyń otyrysyna shyǵarylady

ASTANA. QazAqparat - Búgin Senattyń Áleýmettik-mádenı damý jáne ǵylym komıtetiniń keńeıtilgen otyrysy ótip, onda «Qazaqstan halqy Assambleıasy týraly» Qazaqstan Respýblıkasynyń zańyna ózgerister men tolyqtyrýlar engizý týraly» zań jobasy talqylandy.

Atalǵan qujat Elbasy N.Nazarbaevtyń «Nur Otan» partııasynyń XVI sezinde jáne Qazaqstan halqy Assambleıasynyń XXII sessııasynda bergen tapsyrmalaryn iske asyrýǵa baǵyttalady. Osyǵan oraı, eldegi qoǵamdyq-saıası turaqtylyq jáne etnosaralyq qatynastar salasynda qoldanystaǵy zańnamany jetildirý usynylǵan.

Bul rette Qazaqstan halqy Assambleıasynyń ınstıtýtsıonaldyq rólin kúsheıtetin, qazaqstandyqtardyń qoǵamdyq kelisimi men ulttyq birligin nyǵaıtý úshin jaǵdaılar jasaıtyn, «Máńgilik El» birikken jalpyulttyq patrıottyq ıdeıalar negizinde búkil qazaqstandyq azamattyq birdeılikti jáne básekege qabiletti ultty qalyptastyrýǵa yqpal etetin ózgerister engizilgen.

«Qazaqstan halqy Assambleıasynyń 22-shi sessııasynda el Prezıdenti «Máńgilik El» jalpyulttyq patrıottyq ıdeıasy bazasynda qazaqstandyqtardy azamattyq teńdik, eńbek súıgishtik, ádildik, ǵylymdylyq kýlti jáne bilim syndy qundylyqtar tóńiregine toptastyrýdy aıqyndady. Memleket basshysynyń 5 ınstıtýtty reformasy aıasyndaǵy «100 naqty qadam» Ult josparynyń «Birdeılik jáne birlik» atty 4-shi baǵyty jalpyqazaqstandyq birdeılikti, qoǵam birligin, «Máńgilik El» qundylyqtary júıesin nyǵaıtýdy kózdeıdi. Atalǵan mindetterdi sheshý maqsatynda bizder qoldanystaǵy zańnamany qoǵamdyq-saıası turaqtylyq salasyn jetildirýdi usynamyz», - dedi zań jobasyn tanystyrǵan QR Mádenıet jáne sport vıtse-mınıstri Marat Ázilhanov.

Onyń atap ótýinshe, usynylyp otyrǵan túzetýler «Qazaqstan halqy Assambleıasy týraly» Zańnyń taptaryna «Máńgilik El» jalpyulttyq ıdeıasymen baılanysty birqatar normany qosýdy qamtıdy. Máselen, Zańnyń «Assambleıasy maqsaty» atty baby mynadaı redaktsııada jazylady: «Assambleıanyń maqsaty qazaq halqynyń toptastyrýshy rólin arqaý ete otyryp, qazaqstandyq patrıotızm, Qazaqstan halqynyń azamattyq jáne rýhanı-mádenı ortalyǵy retinde «Máńgilik El» jalpyulttyq patrıottyq ıdeıasymen biriktirilgen qazaqstandyq azamattyq birdeılikti jáne básekege qabiletti ultty qalyptastyrý protsesinde Qazaqstan Respýblıkasynda etnosaralyq kelisimi qamtamasyz etý bolyp tabylady».

Talqylaýdan soń komıtet músheleri zań jobasyn palatanyń jalpy otyrysyna shyǵarý týraly sheshim qabyldady.