«Máńgilik el» ıdeıasy tóńiregine toptassaq, biz almaıtyn asý, alynbaıtyn qamal joq - S.Dosanov

ASTANA. QazAqparat - «Máńgilik el» ıdeıasy tóńiregine toptassaq biz almaıtyn asý, alynbaıtyn qamal joq. Búgin Aqordada QR Memlekettik hatshysy Gúlshara Ábdiqalyqova men elimizdiń belgili qalamgerleri arasyndaǵy kezdesý aldynda jazýshy Sábıt Dosanov osyndaı pikir bildirdi.

Suhbat barysynda qalamger aldaǵy ýaqyttaǵy óziniń shyǵarmashylyq oılarymen bólisti.

«Qazirgi ýaqytta kúıip turǵan máseleniń biri - jer. Jer - qazaqtyń jany, bul máselede problema kóp. Soǵan oraı Kenesary handy jáne basqa da tanymal tulǵalardy qatystyra otyryp pesa jazý oıymda bar», - dedi ol.

Sonymen qatar ol búgingi kúnniń problemasyna roman jazý oıynda bar ekendigin aıtty, ulttyq ıdeologııa tóńireginde de óz oıymen bólisti.

«Ulttyq ıdeologııanyń barlyǵyn Prezıdentimiz aıtýda. Keńes ókimeti qulaǵan kezde ulttyq ıdeologııamyzda bos keńistik boldy. Keńes ıdeologııasy qurdymǵa ketti. Biraq, ıdeologııasyz memleket bolmaıdy. Ideologııa - memlekettiń tireýi. Ideologııanyń kókesi Abaıdyń qara sózderi, Quran sózderi. Munan bólek Prezıdentimizdiń «Máńgilik el» ıdeıasy da - naǵyz ıdeologııa. Osy «Máńgilik el» ıdeıasy tóńiregine toptassaq, basshy bireý, qalǵanymyz tireý bolsaq, biz almaıtyn asý, alynbaıtyn qamal joq»,- dedi S.Dosanov.

Qalamger sonymen birge Elbasymyzdyń «100 naqty qadamyn» ultty alǵa jeteleıtin ıdeıa ekendigin basa atap ótti.