Mandatty bir merzimmen shekteıtin ózgeris prezıdenttikke saılanatyn barlyq adamdarǵa teń qoldanylady - KK
Zań jobasy Konstıtýtsııada Respýblıka Prezıdentiniń bir márte jeti jyldyq ókilettik merzimin belgileýdi, sondaı-aq el astanasynyń ataýyn ózgertýge baılanysty Negizgi Zańnyń 2-babyna túzetýler engizýdi kózdeıdi.
Konstıtýtsııalyq Keńestiń pikirinshe, prezıdenttik jáne parlamenttik saılaý ınstıtýty memlekettiliktiń konstıtýtsııalyq modeliniń barlyq komponentterin qozǵaıtyn erekshe konstıtýtsııalyq qundylyq. Sol sebepti ol memlekettiń mańyzdy organdaryn jańartýdyń tıimdi quraly bolyp tabylady. Osy arqyly Respýblıkanyń áleýmettik negizi, halyqtyń memlekettik bılik bastamalaryn qoldaýy nyǵaıtylady.
Konstıtýtsııalyq Keńes saılaý naýqandary kezeńinde azamattyq qoǵamnyń ártúrli segmentteri jandanatynyna nazar aýdardy. Osy jaǵdaılarda Qazaqstan Respýblıkasynyń Konstıtýtsııasynda baıandy etilgen barlyq qundylyqtar serpindi ári úılesimdi is-áreket etýge tıis.
Konstıtýtsııalyq Keńestiń paıymdaýynsha, prezıdenttik mandattyń bir márte jeti jyldyq merzimin belgileý aǵymdaǵy jylǵy 5 maýsymdaǵy respýblıkalyq referendýmda qabyldanǵan memlekettik bılikti monopolızatsııalaýǵa jol bermeýge baǵyttalǵan konstıtýtsııalyq novellalardyń mánine saı keledi.
Prezıdenttik mandatty bir merzimmen shekteıtin Konstıtýtsııanyń 42-baby 5-tarmaǵynyń usynylyp otyrǵan redaktsııasy atalǵan joǵary laýazymdy tulǵa laýazymyna saılanatyn barlyq adamdarǵa teń negizde qoldanylatyn bolady.Onymen Konstıtýtsııalyq Sot sýdıalarynyń bir márte segiz jyldyq ókilettik merzimin anyqtaý úılesedi.
Osy oraıda, Konstıtýtsııalyq Keńes «Qazaqstan Respýblıkasynyń Konstıtýtsııasyna ózgerister men tolyqtyrý engizý týraly» Zań jobasy Konstıtýtsııada belgilengen talaptarǵa sáıkes dep sanaıdy.
Konstıtýtsııalyq Keńes qorytyndysynyń tolyq mátini buqaralyq aqparat quraldarynda jarııalanady.
Eske salsaq, 12 qyrkúıek kúni Parlament Májilisi depýtattarynyń usynysyna baılanysty respýblıka Prezıdentiniń ótinishi Konstıtýtsııalyq Keńeske joldanǵan edi.