«Manas» dastany 60 jyldan keıin qazaq oqyrmandarynyń qolyna qaıta jetti

NUR-SULTAN. QazAqparat – Dostyq úıinde Túrki akademııasy jáne Qazaqstan halqy Assambleıasynyń uıymdastyrýymen «Bekem baýyrlastyq baılanystar: Manastan Abaıǵa deıin» atty alqaly jıyn ótti, dep habarlaıdy QazAqparat tilshisi.

Shara barysynda Halyqaralyq Túrki akademııasy daıyndaǵan «Manas» eposynyń qazaq tilindegi nusqasy jáne Abaı shyǵarmalarynyń qyrǵyz tilindegi akademııalyq basylymy tanystyryldy.

«Qazaqstan halqy Assambleıasynyń 25 jyldyǵyna oraı eki súıinshi jańalyǵymyz bar. Bul baýyrlastyq baılanysymyzdy bekemdeı túsetin rýhanı qazynalarmen tolyǵyp jatyr. 1961 jylǵy Muhtar Áýezovtiń basshylyǵymen jaryq kórgen «Manas» dastany 60 jyldan keıin qazaq oqyrmandarynyń qolyna qaıta jetip otyr. Jyrshy, manasshy Baıanǵalı Álimjanov óziniń keremet sheberligimen qazaqshalap shyqty», - deıdi Túrki akademııasynyń prezıdenti Darhan Qydyráli.

Sondaı-aq, bıyl uly Abaıdyń 175 jyldyǵy.

«Bul qazaq elinde ǵana emes, baýyrlas túrki jurttarynda da keńinen atap ótilýde. Sonyń bir jarqyn aıǵaǵy – Abaı tek qana qazaqtyń aqyny emes, qyrǵyzǵa da ortaq tulǵa retinde akademııalyq tańdamaly jınaǵy birinshi ret jaryq kórip otyr. Túrik akademııasy osy eki eńbekti sizderge usyný mártebesine ıe boldy», - deıdi ol.

Jıyn bastalǵan kezde atalǵan eki eńbektiń tusaýy kesildi.