Mamyrdyń sońyna deıin «Eýrazııa» munaı jobasyna jańa ınvestorlar qosylýy múmkin

ASTANA. QazAqparat - Bıylǵy kóktemniń sońyna deıin Kaspıı jaǵalaýy oıpańynda kómirsýtekter kenin barlaý jónindegi «Eýrazııa» halyqaralyq jobasyna jańa ınvestorlar qosylýy yqtımal.

Bul týraly búgin Astanada atalǵan joba boıynsha ótip jatqan «dóńgelek ústelde» QR Energetıka mınıstri Qanat Bozymbaev málim etti.

Búginde joba aıasynda jańa ınvestorlardy tartý jóninde belsendi jumystar júrip jatqanyna toqtalǵan mınıstr, «bul kúrdeli jobaǵa sheshim qabyldaý belgili bir ýaqytty qajet etetinin biz jaqsy túsinemiz. Sondyqtan da konsortsıýmnyń áleýetti qatysýshylarynan mamyr aıynyń sońyna deıin  tıisti sheshimdi kútetinimizdi aıtqym keledi»,-dedi.

Sonymen qatar Q. Bozymbaev Kaspıı jaǵalaýy oıpańynyń 30 paıyz bóligi Reseı aýmaǵynda jatqandyǵyn eske salyp ótti. Osy rette Kaspıı jaǵalaýy oıpańynyń biryńǵaı geologııalyq modeliniń qurylymy men geologııalyq zertteý máselesi turǵysyndaǵy yntymaqtastyqqa qos tarap ta múddeli.

Mınıstrdiń aıtýynsha, qazirgi kezde tıisti memlekettik organdardyń, «QazMunaıGaz» kompanııasynyń qatysýymen túrli aspektiler boıynsha jobaǵa qatysýǵa áleýetti kompanııalarmen aldyn ala kelissózder júrgizilýde.

«Osy másele boıynsha biz reseılik áriptestermen belsendi dıalog júrgizýdemiz. Keshe bul taqyrypta mınıstr Donskoımen pikir almastym (RF Tabıǵı resýrstar jáne ekologııa mınıstri Sergeı Donskoı )»,-dep túıdi sózin Q. Bozymbaev.