Mamyrda ınflıatsııa baıaýlaǵanymen jemis pen kókónis baǵasy 23% deıin ósken

ASTANA. QazAqparat - Bıylǵy mamyrda tutyný baǵalarynyń bir aılyq mándegi ındeksi baıaýlap, sáýirdegi 0,9%-ben salystyrǵanda 0,6% qurady. Aqyly qyzmetter baǵasy – 0,7%, azyq-túlik jáne oǵan jatpaıtyn taýarlardyń árqaısynyń baǵasy 0,5%-dan ósti, dep habarlaıdy QazAqparat.

Baǵa ósimi áýe jolaýshylar kóligi qyzmetterine 11,5%, temirjolǵa – 2,5% baıqaldy.

Sanatorıı qyzmetteriniń baǵasy 5,6%, demalys jáne sporttyq is-sharalar salasyndaǵy qyzmetter – 2,9%, mektepke deıingi balalar mekemeleriniń qyzmetteri – 1,7%, densaýlyq saqtaý qyzmetteri 1,4% ósti.

Azyq-túlik taýarlary arasynda mamyrda kókónister men jemisterdiń baǵasy ósken, qyryqqabat 23,8%, pııaz 9,9%, júzim 9,6%, sábiz 8,6%, alma 5,3%, kartop 4% qymbattaǵan.

Baǵa ósimi, sondaı-aq kúrish – 2,5%, salqyndatylǵan sýsyn – 1,9%, sút – 1,8%, shaı – 1,6% boıynsha baıqaldy.

Osy rette qııar 39,6%, qyzanaq 23,7%, tátti burysh 7,6%, qaraqumyq jarmasy 4%, banan 3,8% arzandaǵan.

Mamyrda baǵanyń ósýi ballondaǵy suıytylǵan gazǵa – 1,7%, benzınge – 1,2%, dızel otynyna – 0,7% boldy.

Aldyńǵy aımen salystyrǵanda kıim jáne aıaq kıim 1,3%, jeke qoldaný taýarlary 1,2%, ydys-aıaq 0,9%, jýý jáne tazalaý quraldary 0,8% kóterildi.

Óńirler arasynda eń joǵary aılyq ınflıatsııa Shymkent qalasynda – 1% (ortasha respýblıkalyq deńgeıden 0,4 p.t. joǵary), eń tómengisi Pavlodar oblysynda tirkeldi – 0,1%.

Óńirler boıynsha azyq-túlik taýarlarynyń eń joǵary baǵasy Ulytaý oblysynda – 1,4%, azyq-túlikke jatpaıtyn taýarlar boıynsha Almaty qalasy jáne Soltústik-Qazaqstan oblysynda – árqaısynda 1%-dan, aqyly qyzmetter boıynsha Shymkent qalasynda, ósim – 2,7%.

2023 jylǵy mamyrda jyldyq mánde ınflıatsııa deńgeıi 15,9% qurady.

Azyq-túlik taýarlarynyń baǵasy 16,5%, azyq-túlik emes taýarlar 17,2%, aqyly qyzmetter 13,5% ósti.

2022 jylǵy mamyrmen salystyrǵanda keńse taýarlary 67,5%, qııar 53,4%, kir sabyn 49,7%, ydys jýýǵa arnalǵan quraldar 47,1%, qantsyz qoıýlandyrylǵan sút 46,6%, kúrish 44,9%, kúndizgi statsıonarlyq emdeý 43,6%, shaqpaq qant 42,7% qymbattaǵan.

Kerisinshe, jyldyq mánde qyryqqabat jáne sábiz árqaısysy 19,1%-dan, kartop – 16,8%, ý sarymsaq – 8,4%, qyzylsha 7,1% arzandaǵan.

2023 jylǵy qańtardan bastap tutyný baǵasynyń ındeksin eseptegende azyq–túlik taýarlarynyń úlesi – 41,8%, azyq-túlikke jatpaıtyn taýarlar – 29,6%, aqyly qyzmetter 28,6%.