Mamyr aıynda turǵyn úı naryǵynda baǵalar ózgerdi

ASTANA. QazAqparat - QR Ulttyq ekonomıka mınıstrligi Statıstıka komıtetiniń taratqan málimetterine qaraǵanda 2016 jylǵy mamyr aıynda ótken aımen salystyrǵanda elimizdiń turǵyn úı naryǵyndaǵy baǵa ózgerdi.

«Atap aıtqanda, jańa turǵyn úılerdi satý baǵalary 1 paıyzǵa, abattandyrylǵan turǵyn úılerdi - 0,7 paıyzǵa, abattandyrylmaǵan turǵyn úılerdi satý baǵasy 0,1 paıyzǵa tómendedi. Sonymen qatar, abattandyrylmaǵan turǵyn úıdi jalǵa alý tólemi 2 paıyzǵa, abattandyrylǵan turǵyn úılerdi jalǵa alý  1,8 paıyzǵa tómen boldy», - delingen baspasóz baıanynda.

Keltirilgen málimetterge qaraǵanda, elimizdiń turǵyn úı naryǵynda 2016 jyldyń mamyrynda jańa turǵyn úılerdi satýdyń ortasha baǵasy sharshy metrine 250 myń 712 teńgeni, abattandyrylǵan turǵyn úılerdi satý 191 myń 926 teńgeni qurady. Al abattandyrylmaǵan turǵyn úılerdi alyp satý baǵasy sharshy metrine 115 myń 400 teńge boldy. Sonymen birge, abattandyrylǵan turǵyn úılerdi jalǵa alýdyń respýblıka boıynsha ortasha baǵasy sharshymetrine 1 myń 274 teńgeni quraǵan.