Mamyr aıynda Qazaqstannyń eksporttyq strategııasynyń tujyrymdamasy ázirlenedi

ASTANA. QazAqparat - Bıylǵy jyldyń mamyr aıynda Qazaqstannyń ulttyq eksporttyq strategııasynyń tujyrymdamasy ázirlenedi. Bul týraly búgin Úkimet otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat. 

«Qaıta óńdeý salasyn tıimdi damytý men qazaqstandyq ónimniń eksportyn alǵa jyljytý úshin ınstıtýtsıonaldy negizdi qurý maqsatynda bıylǵy mamyrda mınıstrlik múddeli memlekettik organdarmen birlese Qazaqstannyń ulttyq eksporttyq strategııasynyń tujyrymdamasyn ázirleıdi»,-dedi mınıstr Úkimettiń 2017 jylǵa arnalǵan jumys josparyn tanystyrý barysynda.

Sonymen qatar Súleımenov eksport neografııasyn keńeıtý men oǵan qoljetimdilikti jaqsartý maqsatynda aǵymdaǵy jyldyń birinshi jartyjyldyǵy barysynda birqatar eldermen erkin saýda jóninde kelissózder jalǵasatynyn atap ótti. Osy oraıda ol Úndistan, Mysyr, Sıngapýr, Serbııa, Izraıl jáne basqa da elder qamtylyp otyrǵandyǵyn atap ótti. Munymen qosa, QHR-men saýda-ekonomıkalyq yntymaqtastyq týraly kelisim baǵytynda da kelissózder júrgiziledi.