Mamyr aıynda Elbasynyń qaraýyna «Qazaqtandaǵy 2012 jylǵy adam quqyǵynyń qorǵalýy týraly» baıandama usynylady

ALMATY. 6 naýryz. QazAqparat - Adam saýdasy jáne odan týyndaıtyn problemalar Qazaqstanda jappaı sıpat almaǵan. Bul týraly QR Prezıdenti janyndaǵy Adam quqyǵy jónindegi komıssııa hatshylyǵynyń meńgerýshisi Tastemir Ábishev búgin Almatyda «Májbúrleý men quldyq eńbekke uqsas suranystyń tómendeýi» degen taqyrypta ótip jatqan Ortalyq Azııalyq aımaqtyq suhbat kezinde aıtty.

«QR Prezıdenti janyndaǵy Adam quqyǵy jónindegi komıssııa jyl saıyn Prezıdenttiń qaraýyna «Qazaqstanda adam quqyǵynyń qorǵalý deńgeıi» jóninde baıandama daıyndaıdy. Qazirgi kezde 2012 jylǵy adam quqyǵynyń qorǵalýy týraly baıandama ázirlenýde. Ol mamyr aıynda Elbasynyń qaraýyna usynylady. Onda aldyn alý jáne boldyrmaý máseleleri qarastyrylǵan», - deıdi T.Ábishev. Tastemir Dáýitulynyń aıtýynsha, 2011-2012 jyldary adam saýdasy boıynsha 40-tan astam qylmystyq is qozǵalyp, onyń 16-sy boıynsha sot sheshimi shyǵaryldy. Elimizde adam urlaý, jas balalardy satý, adam organdaryn satý, qyzdardy kommertsııalyq jynystyq qatynaspen aınalysýǵa májbúrleý men zańsyz júrgen eńbek mıgranttardy májbúrlep jumys istetý faktileri kezdesedi. Alaıda bul jappaı sıpat almaǵan. Adam saýdasyna qatysty mundaı faktilerdiń tirkelýi sońǵy jyldary turaqty, dep atap ótti T.Ábishev.