Mamyr aıynda 3 300-den astam altyn quıma satyldy
Halyqqa tazartylǵan altyn quımalardy satý jáne satyp alý baǵdarlamasyn Ulttyq bank 2017 jyly iske qosqan. Baǵdarlama qolǵa alynǵaly jalpy salmaǵy 3,2 tonnaǵa jýyq 94 545 altyn quıma satyldy.
«Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda eń kóp suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi – 26%, ıaǵnı, 24 493 dana. Odan keıin 20 gramdyq quıma kóp satylady – 20 385 dana (22%), 5 gramdyq quımadan 19 468 dana (20%), 100 gramdyq quımadan 18 679 dana (20%), 50 gramdyq quımadan 11 520 dana (12%) satyldy. Altyn quımalar Almaty, Nur-Sultan jáne Atyraý qalalarynda kóp satylady», - dep jazdy vedomstvodan.
Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.
«Baǵdarlama bastalǵannan beri ekinshi deńgeıli bankter men banktik emes jekelegen aıyrbastaý pýnkteri jalpy salmaǵy 330 keli 13 692 altyn quımany keri satyp alǵan, bul – jalpy satylǵan quımalardyń 14%-y. Keri satyp alynǵan altyn quımalardyń barlyǵy derlik Ulttyq banktiń fılıaldary arqyly halyqqa satylady», - dep habarlady Ulttyq bank.
Ár quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapta shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵanysh qoraby sapa sertıfıkaty da bola alady. Sondyqtan, altyn quımany uqyppen saqtap, qorabyn búldirmeý kerek.
Qazir altyn quımalardy ekinshi deńgeıli bankterdiń eseptik kassa bólimderinde jáne banktik emes jekelegen aıyrbastaý pýnkterinde satyp alyp, keri satýǵa bolady.