MÁMS júıesinde tirkelmegenderge medıtsınalyq qyzmetterdi alýda shekteýler bolýy múmkin

<p>MÁMS tólemeıtinderge dárigerge jazylýǵa, belgili bir medıtsınalyq anyqtalamalardy alýǵa shekteýler bolýy múmkin. Bul týraly Densaýlyq saqtaý birinshi vıtse-mınıstri Tımýr Sultanǵazıev aıtty, dep habarlaıdy <a href="Kazinform" target="_blank" rel="noopener">Kazinform</a>.</p>

Búgin Senattyń jalpy otyrysynan keıin tilshiler vıtse-mınıstrden MÁMS tólemeıtinderge qandaı shekteýler engizý josparlanyp otyrǵanyn surady.

Aıta keteıik, buǵan deıin saqtandyrylmaǵan adamdarǵa densaýlyq jáne osy salaǵa qatysty memlekettik qyzmetterdi alý kezinde tıisti shekteý engizý usynyldy. Máselen, kólik júrgizý, qarý-jaraq saqtaý jáne basqa da baǵyttarda osyndaı shekteýler qarastyrylmaq. 

«Bul tek usynys retinde jasaldy. Osy usynystar memlekettik organdarda, qoǵamda, Parlamentte talqylanady. Atap aıtqanda, bul shekteýler halyqaralyq tájirıbe aıasynda zertteldi. Germanııa, Nıderland, Reseı sııaqty elderde (medıtsınalyq saqtandyrylmaǵandarǵa) tıisti shekteýler qarastyrylǵanyn kórip otyrmyz. Sondyqtan atalǵan elderde azamattardyń jaýapkershiligi eskerilgen, onyń ishinde aıppuldar da qarastyrylǵan. Eger adamdar saqtandyrý júıesine qosylmasa, álem elderinde qandaı da bir qyzmetterdi alýǵa shekteý jasaý tájirıbesi bar. Sonyń arasynda júrgizýshi kýáligine qatysty memlekettik qyzmetterdi almaıdy. Bizde kólik júrgizý, qarý-jaraq saqtaý jáne basqa da baǵyttarda osyndaı shekteýler talqylanyp jatyr, ıaǵnı densaýlyq salasy boıynsha tikeleı memlekettik qyzmetter eskerilgen», - dedi T. Sultanǵazıev.

Onyń aıtýynsha, qazir bul usynystar áli de pysyqtalyp jatyr.

«Túrli medıtsınalyq qyzmetter bar, onyń ishinde dárigerge jazylý, belgili bir medıtsınalyq anyqtalamalardy alýǵa shekteýler bolýy múmkin. Jalpy, osy salada birqatar anyqtalamalar beriledi. Talqylaý nátıjesi boıynsha olar jaıynda qosymsha habarlaımyz», - dedi vıtse-mınıstr.

Bul turǵyda Densaýlyq saqtaý mınıstri Ajar Ǵınııat Áleýmettik Mindetti áleýmettik medıtsınalyq saqtandyrý júıesine enbegen adamdarǵa júrgizýshi káýligin berýdi shekteý usynysyna qatysty túsinik berdi. 

«Densaýlyq saqtaý mınıstrliginiń keıbir memlekettik qyzmetterdi shekteý týraly usynystaryna qatysty toqtalsam, bul baǵytta álemdik tájirıbe zerdelendi. Kóptegen elde, ıaǵnı Germanııa, Norvegııa, Ulybrıtanııa jáne basqa da damyǵan elderde tıisti talaptar bar. Eger júrgizýshi kýáligin alǵyńyz kelse, medıtsınalyq saqtandyrý suralady. Atap aıtqanda, basqa memleketke saparlap barǵan kezde de medıtsınalyq saqtandyrýsyz eshkimdi qabyldamaıtynyn bilesizder», – dedi A. Ǵınııat.