MÁMS júıesinde saqtandyrylmaǵan qazaqstandyqtarǵa 12 aılyq jarna tólenedi

NUR-SULTAN. QazAqparat – Qazaqstanda MÁMS-ke tirkelmegenderdi júıege tartýdyń balamaly tetigin engizý josparlanyp otyr. Bul týraly QR Densaýlyq saqtaý mınıstri Ajar Ǵınııat elordada ótken mindetti áleýmettik medıtsınalyq saqtandyrý máselelerine arnalǵan dóńgelek ústel barysynda málimdedi, dep habarlaıdy QazAqparat tilshisi.

«MÁMS (mindetti áleýmettik medıtsınalyq saqtandyrý) júıesinde túzetýdi talap etetin tustary da joq emes. Sonyń biri halyqty MÁMS júıesimen tolyq qamtý máselesi. Búginde 3 mln adam MÁMS júıesinde tirkelmegen, ıaǵnı saqtandyrylmaǵan. Biz óńirlerdi aralap júrmiz. Eshqandaı júıede tirkelmegen, sáıkesinshe tıisti medıtsınalyq kómekti ala almaı júrgen adamdar bar. Bul áserese eldimeken turǵyndaryna qatysty. MÁMS júıesin jetildire túsýde óńirlerdegi ınfraqurylym men medıtsınalyq mekemelerdiń tıisti qural-jabdyqpen qamtamasyz etilýi de mańyzdy», - dedi Ajar Ǵınııat.

Sondaı-aq, mınıstr MÁMS júıesiniń alǵa basýynda kadr máselesiniń de baryn aıtty.

«Medıtsına salasynda tsıfrlandyrýdy qarqyndy túrde engizý kerektigin esten shyǵarmaǵan jón. Depýtattyq korpýstyń qoldaýymen jaqyn arada saqtandyrylmaǵan halyqty MÁMS júıesine tartýdyń balamaly tetigin engizý josparlanyp otyr. Oǵan sáıkes júıede tirkelmegen adamǵa aldyn ala 12 aılyq jarna tóleý qarastyrylyp otyr», - deıdi vedomstvo basshysy.

Buǵan deıin habarlaǵanymyzdaı elimizde joǵary tehnologııanyń kómegimen ota jasaý 3 ese artqan.

Odan bólek, Qazaqstanda ólim-jitimniń 5 paıyz azaıǵany aıtyldy.