MÁMS júıesi boıynsha 29 mln teńgege jalǵan esep berilgen

NUR-SULTAN. QazAqparat – Áleýmettik medıtsınalyq saqtandyrý qorynyń sarapshylary birinshi toqsanda kórsetilgen medıtsınalyq qyzmetterdiń tizimine 3823 qyzmet ótirik engizilgenin anyqtaǵan, dep habarlaıdy QazAqparat tilshisi.

Bul týraly Áleýmettik medıtsınalyq saqtandyrý qorynyń Basqarma tóraǵasy Bolat Tókejanov Ortalyq kommýnıkatsııalar qyzmetinde aıtty.

«Qor halyqqa kórsetilgen medıtsınalyq qyzmetterdiń sapasy men kólemine monıtorıngti jalǵastyrýda. 1 toqsannyń qorytyndysy boıynsha sarapshylarymyz 203,6 myń aqaýlardy anyqtady. Kelgen shyǵyn aıyppuldardy esepke alǵanda 3,5 mlrd teńge boldy», - dedi qor basshysy.

Sondaı-aq, Bolat Tókejanov medıtsınalyq uıymdardyń proaktıvti monıtorıngi jańa engizilimi týraly aqparat berdi.

«Anyqtalǵan aqaýlardyń ishinde 29,3 mln teńgege 3 823 jalǵan esep berilgen. Budan bylaı aqaý anyqtalǵan jaǵdaıda, jetkizýshi qorytyndyǵa qol qoıylǵan kúnnen bastap 45 kúntizbelik kún ishinde aqaýlar men oryndalmaǵan mindettemelerdi joıýy kerek. Joıylmaǵan jaǵdaıda aıyppuldar kózdelgen», -dep qosty qordyń basqarma tóraǵasy.

Jalpy birinshi toqsanda 321 medıtsınalyq uıymda proaktıvti monıtorıng júrgizilipti.

«610 mln teńgeni quraıtyn 61 362 áleýetti aqaý anyqtaldy. Alǵashqy tájirıbe medıtsınalyq uıymdar úshin jaǵdaıdy túzetýge jáne odan ári aqaýlardyń aldyn alýǵa múddeli ekenin kórsetti. Proaktıvti monıtorıng qorytyndysy boıynsha 61 myń aqaýdyń tek 10,4 myń aqaýy boıynsha medıtsınalyq uıymdarǵa aıyppul salyndy», - dedi Bolat Tókejanov.