MÁMS joıyla ma – vıtse-premer jaýaby

<p>ASTANA. KAZINFORM &ndash; Premer-Mınıstrdiń orynbasary Tamara Dúısenova Úkimettiń keńeıtilgen otyrysynan keıingi brıfıngte mindetti áleýmettik medıtsınalyq saqtandyrý júıesiniń joıylý múmkindigine qatysty saýalǵa jaýap berdi.</p>

«Medıtsınalyq saqtandyrý júıesi álemdegi klıent úshin aqsha ustanymynyń júzege asyrylýyn qamtamasyz etetin jalǵyz júıe sanalady. Eger durys jolǵa qoısa, onda árbir emhana men aýrýhana adamdardyń ózderine kelip, sapaly kómek alýyna múddeli bolar edi. Iá, bizde problema bar. Adamdar sapaly kómek alýy úshin bul júıeni ózgertýimiz qajet», - dedi Úkimet basshysynyń orynbasary.

Aıta keteıik, Búgin Úkimettiń keńeıtilgen otyrysynda Memleket basshysy Qasym-Jomart Toqaev MÁMS júıesin synǵa alǵan bolatyn. 

Prezıdentiń aıtýynsha, mindetti áleýmettik medıtsınalyq saqtandyrý júıesiniń iske qosylǵanyna 5 jyl boldy. Sodan beri bul salanyń bıýdjeti eki ese artty. Bıyl 2,6 trıllıon teńge bólinedi.

«Alaıda, medıtsınalyq kómektiń sapasy aıtarlyqtaı jaqsardy dep aıtýǵa bolmaıdy. Kóptegen qyzmet áli de qoljetimdi emes. Budan bólek, kóp jaǵdaıda resýrstar tıimsiz jumsalady. Sonyń saldarynan bul salaǵa qosymsha qarjy bólip, bıýdjetke salmaq salýǵa týra keledi. Úkimet medıtsınalyq saqtandyrý júıesiniń qyzmetin qatań baqylaýǵa alýy kerek. Bul júıe qarapaıym ári túsinikti bolýǵa tıis», - dedi Qasym-Jomart Toqaev.