MÁMS úshin tólegen aqsha qaıda jumsalady
MÁMS júıesi medıtsınalyq kómektiń qoljetimdiligin arttyrý, qarjylandyrý tapshylyǵyn tómendetý qajettiligine baılanysty engizilgen. Eger 2019 jyly densaýlyq saqtaý salasyna 1,03 trln teńge bólingen bolsa, 2023 jylǵa qazirdiń ózinde 2,5 trln teńge qarastyrylǵan. Bul kórsetiletin medıtsınalyq qyzmetterdiń sanyn arttyrýǵa múmkindik berdi, soǵan sáıkes azamattarǵa medıtsınalyq kómek barynsha qoljetimdi boldy.
MÁMS úshin tólenetin aqsha Áleýmettik medıtsınalyq saqtandyrý qoryna túse me?
Kóp adamdar MÁMS tólemderi Qorǵa túsedi jáne ol qarajatty Qor óz qalaýy boıynsha jumsaıdy dep qatelesedi. Jarnalar men aýdarymdar Qazaqstan Respýblıkasynyń Ulttyq bankindegi arnaıy shotqa túsedi (ıaǵnı, tikeleı Qorǵa emes), olar basqa maqsattarǵa jumsalynbaıdy.
Jarnalar qaıda ketedi?
Ulttyq banktegi arnaıy shottan bul qarajat medıtsınalyq uıymdarǵa – Qordyń jetkizýshilerine – mindetti áleýmettik medıtsınalyq saqtandyrý júıesinde kórsetilgen medıtsınalyq qyzmetterge tólem retinde jiberiledi. Demek, saqtandyrylǵan azamattar MÁMS tizbesine engizilgen barlyq qajetti medıtsınalyq kómekti densaýlyq kórsetkishteri boıynsha tegin alady, olar úshin Áleýmettik medıtsınalyq saqtandyrý qory tóleıdi. Mysaly, 2022 jyly MÁMS júıesinde kórsetilgen medıtsınalyq kómekke shamamen 836 mlrd teńge jumsaldy.
MÁMS-ke qansha qarajat tústi?
2023 jylǵy 1 qańtardan bastap 2023 jylǵy 30 maýsymǵa deıingi kezeńde 590,8 mlrd teńge kóleminde jarnalar men aýdarymdar tústi. Onyń ishinde jumys berýshilerdiń aýdarymdary – 37,7%, halyqtyń jeńildikterti bar sanattary úshin tólenetin memleket jarnalary – 33,2%, qyzmetkerlerden túsken jarnalar – 24%, basqa tóleýshiler (jeke kásipkerler, azamattyq-quqyqtyq sıpattaǵy shart boıynsha jumys isteıtinder, ózin-ózi jumyspen qamtyǵandar, derbes tóleýshiler) – 5,1%.
Bul qarajat MÁMS júıesinde kórsetilgen medıtsınalyq qyzmetter úshin tólem retinde aı saıyn jiberiledi.
Eger men medıtsınalyq kómekke júginbesem, jarnalarymdy sheship ala alamyn ba?
Mindetti áleýmettik medıtsınalyq saqtandyrý júıesi – jınaqtaýshy júıe emes, barshaǵa ortaq júıe. Qazaqstandyq model patsıentke densaýlyq jaǵdaıy boıynsha talap etiletin emniń kólemi men qunyn shektemeý úshin áleýmettik baǵdarlanǵan túrde quryldy.
Mysal retinde qarastyraıyq. Bir jyl ishinde múmkin bolatyn eń joǵary jarnamen 1 adam tek 168 myń teńge (aıyna 14 000 teńgeden) jınaıdy. Bul qarajat derbes shotta jınalyp, patsıent olardy óz qalaýy boıynsha emdelý úshin paıdalana alady dep esepteıik. Biraq, bul somaǵa ol shekteýli mólsherde ǵana em ala alady.
Tek standartty synaqtar jıyntyǵy, gormondardy, ınfektsııalardyń bolýyn tekserý úshin birneshe ondaǵan myń qajet. Eger ýltradybystyq, kardıogramma, KT/MRT jáne basqa aspaptyq dıagnostıka qajet bolsa she? Demek, bir jyl ishinde jınaqtalǵan jarnalar dıagnoz qoıý úshin tolyq tekserýden ótýge de jetkiliksiz bolýy yqtımal. Sonymen qatar, kúndizgi statsıonarǵa barý nemese táýlik boıy aýrýhanaǵa jatý qajet bolýy múmkin.
Eger ota jasalatyn bolsa, olardyń quny birneshe mıllıon teńgege jetýi múmkin, onda patsıent jaı ǵana medıtsınalyq kómeksiz qalady. Jınalǵan qarajat emdelýge ketetin shyǵyndy jabýǵa jetpeıdi. Bul tásil patsıenttiń ózine tıimsiz.
Sondyqtan, MÁMS júıesiniń otandyq modelinde barlyq qarajat Ulttyq banktegi biryńǵaı arnaıy shotqa túsedi. Al sol jerden qarajat tóleýshiniń sanatyna jáne tólegen jarnalardyń mólsherine qaramastan, barlyq saqtandyrylǵan azamattarǵa MÁMS boıynsha kórsetilgen medıtsınalyq kómek úshin tólenedi.
Qosymsha suraqtar nemese medıtsınalyq kómekke qatysty máseleler týyndaǵan jaǵdaıda, siz ózińizdiń klınıkańyzdaǵy «Patsıentterdi qoldaý qyzmetine» júgine alasyz. Eger jaǵdaıdy jergilikti jerde sheshý múmkin bolmasa, onda Áleýmettik medıtsınalyq saqtandyrý qoryna ózińizge yńǵaıly kelesi baılanys arnalary boıynsha ótinish jibere alasyz:
Qoldau 24/7 mobıldi qosymshasy
fms.kz resmı saıty
Telegram-daǵy @SaqtandyrýBot
1414 biryńǵaı baılanys ortalyǵy.
Sondaı-aq, Qor medıtsınalyq saqtandyrý júıesindegi mártebeńizdi tekserip, tólemder týraly aqparatty egov.kz elektrondyq úkimettiń saıtynda «Densaýlyq saqtaý» bólimindegi «Medıtsınalyq qyzmetterdi tutynýshy retinde mindetti áleýmettik medıtsınalyq saqtandyrý júıesine qatysý týraly jáne aýdarymdardyń jáne (nemese) jarnalardyń aýdarylǵan somalary týraly aqparat berý» qyzmeti arqyly alýǵa bolatyndyǵyn eske salady.