MÁMS ýaqytyly tólenbese ósimpul men aıyppul qarastyrylǵan ba

NUR-SULTAN. QazAqparat –Mindetti áleýmettik medıtsınalyq saqtandyrý (MÁMS) tólemderi ýaqytyly jasalmasa ósimpul men aıyppul qarastyrylǵan ba? Osy suraqqa Áleýmettik medıtsınalyq saqtandyrý qory túsinik berdi, dep habarlaıdy QazAqparat tilshisi.

«Jumysshylar, ózin jumyspen qamtyǵandar, óz erkimen tólem jasaǵandar men Biryńǵaı jıyntyq tólem júrgizgender úshin MÁMS týraly zańnamada eshqandaı sanktsııalar qarastyrylmaǵan», - delingen qordyń málimetinde.

Atalǵan qor baspasóz qyzmetiniń habarlaýynsha, ósimpul MÁMS boıynsha bereshegi bar jumys berýshiler úshin qarastyrylǵan.

«Eger jumys berýshi qyzmetkeri úshin tólemese nemese ony ýaqytyly jasamasa, jumysshy MÁMS paketinde medıtsınalyq kómekti almaýy múmkin. Onyń júıedegi mártebesi «Saqtandyrylmaǵan» dep sıpattalady. Bul óz kezeginde jeke kásipkerlikke de qatysty, ıaǵnı onyń ıesi jalǵyz qyzmetker bolyp sanalǵan jaǵdaıda», - dep atalyp ótken qor mamandarynyń jaýabynda.

Ósimpul eseptelgeni týraly eskertý bolǵan jaǵdaıda, aýmaqtyq memlekettik kirister departamentine júginý kerek. Medıtsınalyq saqtandyrý qoryna tek jarnalar, aýdarymdar men ósimpuldar kelip túsedi. Alaıda jarna tólenbegeni úshin ósimpul men MÁMS-ke aýdarymdardy esepteýdi salyq organdary júzege asyrady.