MÁMS: Turǵyndar 2020 jylǵa deıin saqtandyrý júıesindegi statýsyn anyqtaýlary tıis

NUR-SULTAN. QazAqparat - Medıtsınalyq saqtandyrý qory turǵyndardyń saqtandyrý júıesindegi mártebesin anyqtaýǵa múmkindik beretin arnaıy jobany iske qosty. Atalǵan plagın arqyly kez kelgen azamat saqtandyrý júıesindegi mártebesin anyqtaı alady, dep habarlaıdy «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń Almaty fılıaly.

«Statýsty anyqtaý úshin azamattar www.fms.kz saıtyna kirip, JSN engizýi qajet. Nátıjesinde árkim óziniń saqtandyrylǵan-saqtandyrylmaǵanyn bile alady. Sonymen qatar, júıe arqyly azamattar jumys berýshiler aýdaryp jatqan tólemder jaıynda da tolyq málimet ala alady. Jobanyń basty maqsaty – halyqtyń ýaqytyn únemdep, suranysqa saı júıeni barynsha yńǵaılandyrý», - delingen baspasóz baıanynda.

Eske sala keteıik, 2020 jyldyń 1 qańtarynan bastap Qazaqstanda MÁMS júıesi bastalady.

«Osy ýaqytqa deıin turǵyndar tegisteı derlik saqtandyrý júıesindegi statýsyn anyqtap alýy kerek. Saqtandyrylmaǵan azamattar kepildendirilgen tegin medıtsınalyq kómek paketine engen qyzmetterdi paıdalana alady. Al, MÁMS paketine engen medıtsınalyq kómek túrleri saqtandyrylǵan azamattarǵa ǵana kórsetiledi», - delingen habarlamada.

Ázirleýshilerdiń pikirinshe, ámbebap júıeni aldaǵy ýaqytta barlyq ınternet-rýsýrstar arqyly paıdalanýǵa múmkindik týmaq. Ol úshin qyzyǵýshylyq tanytqan saıt ıeleri plagındy ornatýy tıis.