MÁMS sybaılas jemqorlyqqa qarsy qyzmet nazaryna ilikti
«Tek densaýlyq saqtaý ǵana emes memlekettik basqarýdyń ózge de salalary belgili bir dárejede jemqorlyqqa jol berip alady. Al densaýlyq saqtaý salasyna qatysty aıtar bolsam, taıaýda «SQ-Farmatsııa» JShS qyzmetindegi jemqorlyq táýekelderge syrtqy saraptamany aıaqtadyq. Jemqorlyq táýekelderdi tómendetý, jalpy dárilik zattar men medıtsınalyq maqsattaǵy buıymdardyń biryńǵaı dıstrıbıýtory qyzmetiniń tıimdiligin arttyrý boıynsha keshendi usynystar engizildi. Kúni keshe ǵana birlesken buıryqqa qol qoıylyp, endi Áleýmettik medıtsınalyq saqtandyrý qoryna syrtqy saraptama bastaımyz», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, agenttik qyzmetkerleri Densaýlyq saqtaý mınıstrliginiń, atalǵan qordyń mamandarymen birlesip, uıym qyzmetindegi jemqorlyq táýekelderdi joıý máselelerin qarastyratyn bolady.
«Іndet kezinde elimizdiń birqatar óńirinde ókpeni jasandy jeldetý apparattaryn joǵary baǵamen satyp alýdyń birneshe faktisi anyqtaldy. Biz bul aqparatty jan-jaqty jetkizdik. Tolyqtaı alǵanda, kez kelgen saladaǵydaı táýekelder, zańbuzýshylyqtar bar. Biraq, olardy jappaı oryn alyp jatyr deýge bolmaıdy. Memlekettik qyzmetshilerdiń basym bóligi adal, parasatty adamdar», - dedi Oljas Bektenov.