MÁMS: Stomatologııalyq qyzmet kórsetýge ózgeris engizildi
Astana qalasy boıynsha Qormen kelisimshartqa otyrǵan 58 medıtsına uıymy stomatologııalyq kómek kórsetedi, onyń 15-i – memlekettik, qalǵany – jekemenshik klınıkalar.
Bıyl MÁMS esebinen stomatologııalyq qyzmet kórsetýde ne ózgerdi?
Stomatologııalyq kómek kórsetý protsesinde esh ózgeris joq, patsıentter burynǵydaı medıtsınalyq kómek alady. Tek kelisimshartqa otyrý ádisi ıaǵnı shart jasasý jaǵy ózgerdi. Buǵan deıin stomatologııalyq klınıkalar ózara shartqa otyrý arqyly qosalqy merdiger retinde medıtsınalyq qyzmet kórsetse, 1 qańtardan bastap Qor kórsetilgen qyzmetter kólemin baqylap, sapasyna monıtorıng jasaý úshin tikeleı osy klınıkalarmen shartqa otyrdy. Demek endi stomatologııalyq klınıkalar ózderiniń qansha qyzmet kórsetkenin jáne Qormen kelisimshart boıynsha qansha qyzmet kórsetetinin óz betinshe qadaǵalap otyrý kerek. Buryn bunymen artylǵan júktemege qaramastan patsıenttiń tirkelgen emhanasy aınalysyp keldi. Saldarynan patsıent almaǵan medıtsınalyq qyzmetti aldy dep jazatyn jaǵdaılar kezdesedi. Qor sarapshylary buny monıtorıng jasaǵan kezde medıtsınalyq qujattardan anyqtady.
Qazirgi ýaqytta stomatologııalyq kómekti kimder ala alady?
MÁMS júıesindegi nemese TMKKK sheńberindegi stomatologııalyq qyzmetter barlyǵyna emes, halyqtyń jekelegen áleýmettik osal sanattaryna ǵana qoljetimdi. Mysaly, josparly stomatologııalyq kómekti tek balalar men júkti áıelder ǵana ala alady. Qatty aýyrsyný kezinde azamattardyń 10 sanaty, onyń ishinde balalar men júkti áıelder, zeınetkerler, múgedektigi bar adamdar jáne olarǵa kútim jasaıtyn jumys istemeıtin adamdar, onyń ishinde múgedektigi bar nemese birinshi toptaǵy múgedektigi bar balalar, áleýmettik mańyzy bar jáne juqpaly aýrýlary bar patsıentter, kóp balaly analar, ataýly áleýmettik kómek alýshylar jáne basqalar shuǵyl kómek ala alady.
Stomatologııalyq qyzmetterdi alý kezinde belgili bir medıtsınalyq uıymǵa tirkeýde bolýy mańyzdy ma jáne stomatologııalyq klınıkalar «óz» emhanalaryna tirkelýdi talap ete ala ma?
Joq, talap ete almaıdy. Qazir biz áleýmettik jelilerde stomatologııalyq klınıkalardyń habarlamalaryn kórip otyrmyz. Olardyń aıtýynsha, Qor qarjylandyrýdy qysqartyp, qyzmetter shekteýli mólsherde nemese stomatologııalyq klınıkada tek belgili bir emhanaǵa tirkelgen azamattardyń sanatyna ǵana kórsetiletin bolady. Áıtpese aqyly negizde kómek alý usynylady. Bul aqparat shyndyqqa janaspaıtynyn aıtý kerek.
Bizge osy másele boıynsha kóptegen shaǵymdar tústi. Qor olardy qarap, patsıentterdiń quqyǵyn qorǵaý boıynsha tıisti sharalar qabyldaıdy.
Stomatologııalyq qyzmet kórsetý úshin emhanadan joldama alý kerek pe?
Emhanadan joldama kerek emes. Eń bastysy, patsıent MÁMS nemese TMKKK aıasynda stomatologııalyq kómek kórsetiletin sanattardyń birine jatýy jáne medıtsınalyq kórsetkishteri bolýy tıis.
MÁMS esebinen stomatologııalyq kómek alý úshin saqtandyrý mártebesi qajet pe?
Munda da basqa medıtsınalyq qyzmetterdegideı qaǵıdatpen jumys isteıdi. Eger medıtsınalyq qyzmet MÁMS júıesinde kórsetiletin qyzmetter tizimine kirse, mysaly, josparly medıtsınalyq kómek alý úshin, saqtandyrý mártebesi mindetti túrde kerek. Eger qyzmet TMKKK tiziminde bolsa, mysaly, qatty aýyrsyný bolsa, onda mártebe qajet emes jáne medıtsınalyq qyzmet tegin kórsetiledi. Patsıentter barlyq medıtsınalyq qyzmet túrlerin tek medıtsınalyq kórsetkishter boıynsha ǵana ala alady.
Josparly stomatologııalyq kómek alýshylar – balalar men júkti áıelder. Balalar – memleket jarna tóleıtin azamattardyń birinshi jeńildik sanaty. Sonymen birge jumys istemeıtin júkti áıelder de jeńildik sanatyna kiredi.
MÁMS esebinen qandaı stomatologııalyq qyzmetter kórsetiledi?
Negizi kórsetiletin medıtsınalyq qyzmetter tizbesi aýqymdy. Kásibı tilmen aıtqanda, stomatologııalyq klınıkalar ambýlatorııalyq deńgeıde konsýltatsııalyq-dıagnostıkalyq qyzmetter men manıpýlıatsııalar usynady. Munda plombalaý, tisti julý jáne jansyzdandyrý qyzmetterin alýǵa bolady.
Sondaı-aq MÁMS júıesinde jaq-bet aımaǵynyń týa bitken patologııasy bar balalarǵa ambýlatorııalyq deńgeıde ortodontııalyq plastına ornatylady.
Stomatologııalyq klınıkany ózi tańdaýǵa bola ma?
Iá, bolady. Tek aldymen, ol klınıka Áleýmettik medıtsınalyq saqtandyrý qorynyń jetkizýshisi me, sony tizimnen anyqtap alǵan jón. Jetkizýshilerdiń tizimin fms.kz resmı saıtynan kórýge bolady nemese klınıkanyń ózinen suraý kerek.
Qazir emhanalarda stomatologııalyq kómek qarastyrylǵan ba, oǵan kimder júgine alady?
Tıisti jabdyqtary men mamandary bar emhanalarda stomatologııalyq kómek alýǵa bolady. Munda tek osy emhanaǵa tirkelgen azamattar ǵana emes, basqa jerde tirkelgen azamattar da kómek ala alady. Ol úshin tirkeý bólimi arqyly qabyldaýǵa jazylý kerek.
Eger patsıentke MÁMS esebinen stomatologııalyq qyzmet kórsetýden bas tartsa nemese tolyq kólemde medıtsınalyq kómek kórsetilmese ne isteý kerek?
Bul jaǵdaıda osy klınıkanyń patsıentterdi qoldaý qyzmetine habarlasý kerek nemese Qoldau 24/7 mobıldi qosymshasy, nemese 1406 nómiri arqyly Medıtsınalyq saqtandyrý qoryna habarlasý kerek.