MÁMS: SQO-da kompıýterlik dıagnostıkadan tegin ótý 9 ese artty

PETROPAVL. QazAqparat – Soltústik Qazaqstan oblysynda mindetti medıtsınalyq saqtandyrýdy engizýdiń nátıjesinde halyqqa kórsetiletin konsýltatıvtik-dıagnostıkalyq qyzmet, sonyń ishinde qymbat turatyn kompıýterlik tomografııa (KT) jáne magnıttik-rezonansty tomografııadan (MRT) ótý qoljetimdi bola tústi, dep habarlaıdy QazAqparat tilshisi.

SQO Taıynsha aýdanyndaǵy medıtsınalyq uıymdarǵa baspasóz týry uıymdastyryldy. Maqsat – mindetti áleýmettik medıtsınalyq saqtandyrý aıasynda óńirdiń eldi mekenderindegi medıtsınalyq uıymdardyń jumysyn jáne onyń turǵyndarǵa qanshalyqty qoljetimdi ekendigin kórsetý.

Taıynsha aýdanaralyq kópsalaly aýrýhana búginde zamanaýı medıtsınalyq qondyrǵylarmen jabdyqtalǵan, munda kadr tapshylyǵy joq. Joǵary bilikti mamandar óńirdiń birneshe aýdanyna jáne Aqmola oblysynyń jaqyn ornalasqan eldi meken turǵyndaryna qyzmet kórsetedi. Aýrýhana syrqattary oblys ortalyǵyna barmaı-aq tar aýqymdy mamanǵa kórine alady, hırýrgııalyq kómekti, gemodıalız, qalpyna keltirý emin jáne konsýltatıvti-dıagnostıkalyq qyzmetti de, sonyń ishinde KT men MRT-ny da osy aýrýhanada óte alady.

Mamandardyń aıtýynsha, MÁMS-ti engizýdiń nátıjesinde aýyldyq aýrýhanada pallıatıvtik kómekti de alýǵa bolady.

«Óte aýyr haldegi syrqattarǵa da qazir táýlik boıy medıtsınalyq kómek bere alamyz. Medbıbi kómegin qajet etetinderge arnalǵan jatyn oryndarymyz bar. Bizdiń óńirde jalǵyzilikti qart adamdar barshylyq. Olardy aýrýhanaǵa jatqyzyp, qýattyq dári-dármekter berip, 15-20 kúnniń ishinde densaýlyqtaryn qalypqa keltiremiz. Bizdiń turǵyndarymyzǵa yńǵaıly bolýy úshin Aqmola oblysynyń medıtsınalyq uıymdarymen kelisim jasalǵan. Bizdiń patsıentterge dárigerdiń keńesin alý úshin Petropavlǵa barýdyń qajeti joq», - deıdi aýrýhananyń bas dárigeri Anatolıı Rafalskıı.

Baspasóz týryna qatysýshylar sondaı-aq Taıynsha aýdanyndaǵy Kellerovka otbasylyq-dárigerlik ambýlatorııanyń jumysymen tanysty.

Taıynsha aýdanynda turǵyndarǵa medıtsınalyq kómek medıtsınalyq uıymdardyń jelisi arqyly kórsetiledi. Oǵan bir aýysymda 400 adamdy qabyldaı alatyn emhana, 120 jatyn orny bar statsıonar, 6 dárigerlik ambýlatorııa, 4 feldsherlik-akýsherlik pýnkt jáne 61 medıtsınalyq pýnkt kiredi.

Áleýmettik medıtsınalyq saqtandyrý qorynyń málimetinshe, SQO-da qańtar aıynyń qorytyndysy boıynsha, konsýltatıvti-dıagnostıkalyq qyzmet turǵyndarǵa eki ese artyq kórsetilgen. Sonyń ishinde KT men MRT-ǵa túskenderdiń sany 9 ese artqan. 2019 jyldyń qańtarynda qymbat dıagnostıkany 82 adam ǵana ótse, bıyl olardyń sany 739-ǵa jetken.