MÁMS: Shyǵys Qazaqstanda 180 myńnan astam bala tegin emdeldi

ÓSKEMEN. QazAqparat – Shyǵys Qazaqstan oblysynda mindetti áleýmettik medıtsınalyq saqtandyrý boıynsha 180 myńnan astam medıtsınalyq qyzmet kórsetildi, dep habarlaıdy QazAqparat tilshisi.

ShQO densaýlyq saqtaý basqarmasy baspasóz qyzmetiniń málimetinshe, ótken jyly oblystyq Ana men bala ortalyǵy bazasynda Balalardy ońaltý ortalyǵy ashylǵan.

Búginge deıin bul medıtsınalyq mekemede 300-den astam bala emdeldi. Munda túrli jaraqat alǵan, otadan keıin, DTsP dıagnozy bar jáne kardıohırýrgııalyq naýqas balalardy ońaltý jumystary júrgiziledi.

«Bul jerde eń joǵary tehnologııalyq jabdyqtar men ońaltýdyń eń ozyq ádistemeleri paıdalanylady. Elimizde ońaltý salasyna byltyrdan engizilgen medıtsınalyq saqtandyrý júıesiniń paıdasy mol boldy. Máselen, qazir kishkentaı patsıentter jylyna úsh ret ońaltý ortalyǵyna kelip, em ala alady», - deıdi ońaltý ortalyǵynyń meńgerýshisi Azamat Raıymbekov.

Zamanaýı ońaltý ortalyǵynyń mamandary MÁMS júıesinde balalar medıtsınalyq kómektiń barlyq túrin tolyqtaı tegin alatynyn atap ótti.

Balalarǵa mýltıdıstsıplınarlyq dárigerler komandasy, ıaǵnı reabılıtolog, nevrolog, psıholog, travmatolog-ortoped, tárbıeshi, neırohırýrg, fızıoterapevt, pedıatr, massaj mamany qyzmet kórsetedi.

Arnaıy jabdyqtalǵan bólmelerde mamandar patsıenttermen jumys isteýde.

Jalpy MÁMS aıasynda búldirshinderge 231 mln teńge somasynda 180 myńnan astam medıtsınalyq qyzmet kórsetildi.